Jesus trifft sich z Galiläa mit sine Jünger. Er git ihne en sehr wichtige Uftrag: «Göhnd und mached us Mensche Jünger, und das i allne Länder. Lehred si all das, wo ich euch glehrt ha, und taufed si.» Er verspricht ihne: «Ich bin di ganzi Ziit bi euch. Vergessed das nie.»

Während de 40 Täg nach sinere Uferstehig zeigt sich Jesus Hunderte vo Jünger z Galiläa und z Jerusalem. Er lehrt si ganz vil wichtigi Sache und macht vil Wunder. Er seit zu ihne: «Bliibed z Jerusalem und warted uf das, wo de Vater versproche het.»

D Aposchtel chömmed aber nid drus, was Jesus ihne wett säge. Drum fraged si ihn, wo si sich es letschts Mal uf em Ölberg treffed: «Wirsch du jetzt de König vo Israel?» Jesus git ihne zur Antwort: «Für Jehova isch jetzt no nid d Ziit, dass ich König wird. Glii werded ihr de heilig Geischt übercho, wo euch Chraft git, und ihr werded mini Züge sii. Göhnd go predige: z Jerusalem, z Judäa, z Samaria und uf de ganze Welt.»

Jesus wird denn i Himmel ufe gno und e Wolke verdeckt ihn. D Jünger lueged ihm no lang nache, aber si gsehnd ihn nüm.

Denn laufed si vom Ölberg abe und göhnd uf Jerusalem. Dört treffed si sich wie immer im obere Stock vomene Huus und beted zäme. Si warted druf, dass Jesus ihne seit, was si wiiter sölled mache.