Jesús ja ükaninkrö nitre ja tötikaka kwe yebe kä Galilea yekänti. Kukwe ütiäte biani kwe nuaindre ietre: ‘Mun nän, aune nitre nünanka kä jökräbiti tibien, yekänti mun nän ti mike gare ietre aune munkwe niaratre mika ja tötikaka siba tibe aune munkwe niaratre ngöka ñöte’. Ye bitikäre kukwe ne käbämikani kwe ietre: ‘Munkwe ngwan törö jai, ti tädi kärekäre munbe’.

Jesús ganinkröta ye bitikäre, köbö 40 te ja mikani tuare kwe nitre ja tötikaka kwati krubäte kwe yei kä Galilea aune Jerusalén yete. Kukwe ütiäte ja töi kräke driebare kwe ietre aune jondron ñan tuabare nuainbare kwe keta kabre. Biti ja ükaninkrö mrä kwe nitre apóstol yebe ngutuä Olivo yekänti. Jesús kukwe ne niebare ietre: ‘Mun ñaka kämikaka Jerusalén. Ti Rün dre käbämikani munye ye munkwe ngüba jankunu’.

Jesús dre niebare ye ñaka nükani gare nitre apóstol ie, ye medenbätä niaratre käkwe ngwantaribare ie: ‘¿Mä bikera nemen reire nitre Israelbiti ya?’. Jesús niebare ietre: ‘Gwäune Jehová tö jämi ti tuai nemen reire. Akwa köbö näin braibe ta angwane üai deme rabai munkwe ye käkwe mun mikai dite aune mun rabai testiko tikwe. Aisete mun nän kukwe driere Jerusalén, Judea, Samaria aune kä bäri mente känti’.

Angwane Jesús nikani kä kwinbiti aune muta nikanibiti. Nitre ja tötikaka kwe ye namani okwä kä kwinbiti, akwa niara nianinkä niaratre okwäte.

Nitre ja tötikaka kwe kämikaninkä ngutuä Olivo yekänti aune nikanintre Jerusalén. Yete käre niaratre nämene ja ükökrö cuartote kwin aune nämene orare. Jesús kukwe mada mikadre gare ietre ye niaratre nämene ngübare.