Nakigkita si Jesus sa iya mga sumulunod sa Galilea. Ginhatagan niya sila sing importante gid nga sugo: ‘Kadtui ninyo ang mga tawo kag tudlui ninyo sila para mangin disipulo ko. Tudlui ninyo sila sang mga butang nga gintudlo ko sa inyo kag bawtismuhi ninyo sila.’ Dayon nagpromisa sia: ‘Dumduma ninyo, kaupod ninyo ako pirme.’

Sa sulod sang 40 ka adlaw sa tapos si Jesus mabanhaw, nagpakita sia sa ginatos niya ka disipulo sa Galilea kag sa Jerusalem. Gintudluan niya sila sing importante nga mga leksion kag naghimo sing madamo nga milagro. Dayon nagpakita si Jesus sa iya mga apostoles sa katapusan nga tion sa Bukid sang mga Olibo. Sia nagsiling: ‘Indi kamo maghalin sa Jerusalem. Hulata ninyo ang ginpromisa sang Amay.’

Wala maintiendihan sang iya mga apostoles ang iya buot silingon. Namangkot sila sa iya: ‘Mangin Hari ka na bala subong sang Israel?’ Si Jesus nagsabat: ‘Indi pa ini ang tion nga himuon ako ni Jehova nga Hari. Sa indi madugay, magabaton kamo sing gahom paagi sa balaan nga espiritu, kag mangin saksi ko kamo. Lakat kamo kag magbantala sa Jerusalem, sa Judea, sa Samaria, kag sa pinakamalayo nga bahin sang duta.’

Dayon nagpaibabaw si Jesus pakadto sa langit kag ginlipdan sia sang panganod. Padayon nga nagatangla ang iya mga disipulo, pero indi na nila sia makita.

Naghalin ang mga disipulo sa Bukid sang mga Olibo kag nagkadto sa Jerusalem. Regular sila nga nagatipon sa isa ka kuarto sa ibabaw kag nagapangamuyo. Ginahulat nila si Jesus para sa dugang nga mga instruksion.