Jesus wa hakaena ku novahongewa ve moGalilea. Eye we ve pa erakiza enanḓengu ndi: ‘Twendeye mu kaise po ovandu ovahongewa momahi aehe. Ve hongeye oviṋa mbi mbe mu honga nu mu ve papitise.’ Okuzambo we ve kwizikira nai: ‘Tjiweye kutja, ami aruhe me kara puna eṋe.’

Momayuva 40 wokombunda yombendukiro ye, Jesus we rimunikisa kovahongewa ve ovengi moGalilea na moJerusalem. Eye we ve honga oviṋa ovinanḓengu na tjiti ovihimise. Okuzambo Jesus wa hakaena ku novaapostele ve otjikando otjisenina, kOndundu yOmiṋinga. Eye wa tja ku wo: ‘Amu zumo moJerusalem. Undjeye imbi Tate mbya kwizika.’

Ovaapostele ve kaave tjiwa kutja ma hee tjike. Owo ve mu pura nave tja: ‘Ove nai mo rire Ombara yaIsrael?’ Jesus wa tja: ‘Ngunda karuveze rwaJehova ku ami okurira Ombara. Moruyaveze rwopopezu mamu pewa ombepo ondjapuke nu mamu rire ovahongonone vandje. Twendeye mu kazuvarise moJerusalem, Judea, Samaria na kotukondwa twokokure tjinene mehi.’

Okuzambo Jesus wa toorwa na twarewa keyuru nu otjikamba tje mu kovera. Ovahongewa ve aave tara kombanda, posiya tjandje eye wa i rukuru.

Ovahongewa va heruka kOndundu yOmiṋinga nave i koJerusalem. Owo aave worongana pamwe aruhe metuwo rokombanda nokukumba. Owo aave undju ku Jesus kutja me ve pe omirari vyokomurungu.