Ba menua Galili, Jesus betemu enggau bala murid iya. Iya meri sida siti pesan ti berat: ‘Bejalai kita ngagai semua bansa lalu gaga sida nyadi murid aku. Ajar sida utai ke udah diajar aku ngagai kita lalu baptisa sida.’ Udah nya iya besemaya: ‘Kingatka, aku deka seruran enggau kita.’

Dalam kandang 40 hari pengudah iya diangkat idup baru, Jesus ngayanka diri ngagai beratus iku murid iya ba Galili enggau Jerusalem. Iya ngajar sida utai ti beguna sereta ngaga mayuh kereja ajih. Ke penudi iya, Jesus betemu enggau bala rasul iya ba Bukit Kana.

Jesus udah madahka bala rasul iya: ‘Anang ninggalka Jerusalem. Terus nganti pemeri ti udah disemaya Apai.’ Bala rasul enda meretika utai ku iya. Nya alai, sida nanya iya: ‘Kati nuan deka nyadi Raja orang Israel diatu?’ Saut Jesus: ‘Tu bedau maya Jehovah ngasuh aku nyadi Raja. Enda lama agi, kita deka nerima kuasa ari roh kudus, lalu kita deka nyadi saksi aku. Mupuk meh nginjil ba Jerusalem, Judea, Samaria, enggau ngagai ujung dunya.’

Udah nya, Jesus diangkat ke langit lalu remang ngelindung iya. Bala murid iya terus engkadah ke langit, tang iya nadai agi dipeda.

Bala rasul ninggalka Bukit Kana lalu mansang ngagai Jerusalem. Sida begempuru ba sadau rumah lalu besampi enggau tetap. Sida benung nganti Jesus meri iring ke bukai.