Nọ Jesu avọ ilele riẹ a wariẹ ruẹ oma evaọ obọ Galili, o te juzi jọ nọ u wuzou gaga kẹ ai inọ: ‘Wha nyai wuhrẹ ahwo erẹwho kpobi re a zihe ruọ ilele. Wha wuhrẹ ae re a ru eware kpobi nọ me wuhrẹ owhai, jẹ họ ae ame.’ Ọ tẹ ta kẹ ae nọ: ‘Mẹ te jọ kugbe owhai ẹsikpobi.’

Evaọ edẹ 40 nọ Jesu ọ rọ jọ otọakpọ nọ a kpare iẹe ze no, ọ romavia kẹ ilele riẹ buobu evaọ Galili gbe Jerusalẹm. O wuhrẹ rai eware buobu je ru iruo igbunu buobu. Jesu ọ tẹ nyabru ikọ riẹ orọ urere evaọ Ugbehru Olivi. Ọ tẹ ta kẹ ae nọ: ‘Wha no Jerusalẹm hu. Wha rẹro oware nọ Ọsẹ na ọ ya eyaa riẹ kẹ owhai.’

Ikọ riẹ a wo otoriẹ ẹme nọ ọ jẹ ta na ha. A tẹ nọ Jesu inọ: ‘Kọ who ti zihe ruọ Ovie Izrẹl obọnana?’ Jesu ọ tẹ ta nọ: ‘Oke nọ Jihova o fihọ nọ me ti ro zihe ruọ Ovie u ri te he. Rekọ wha ti wo ogaga nọ ẹzi ọfuafo na o te bru owhai ze no, wha ve ti se isẹri kpahe omẹ. Wha ta usiuwoma evaọ Jerusalẹm, Judia, Sameria, gbe oria nọ o mai thabọ evaọ akpọ na.’

Ẹsiẹvo na Jesu o te bi muvrẹ kpobọ odhiwu, ẹgho o te ruru ei. Ilele na a te gbe bi rri ehru, rekọ a gbẹ ruẹ e riẹ hẹ.

Ilele na a te no Ugbehru Olivi na zihe kpobọ Jerusalẹm. Ẹsikpobi a jẹ hai kokohọ ubruwou ehru jọ re a lẹ. Ilele na a jẹ hẹrẹ Jesu re ọ kẹ ae ekpọvio efa.