Yesũ e Kalilii nĩwakomanie na aatĩĩi make na amanenga mwĩao ũũ wa vata: ‘Endai mũkatwʼĩkĩthye andũ ma mbaĩ syonthe amanyĩwʼa. Mamanyĩsyei maũndũ ala namũmanyĩisye, na mũimavatisa.’ Na ĩndĩ amatha atĩĩ: ‘Ngeethĩawa vamwe nenyu mavinda onthe.’

Kuma Yesũ athayũũkwʼa, nĩwaumĩlĩĩile amanyĩwʼa make maana maingĩ mavinda me kĩvathũkanyʼo. Eekie ũu vandũ va mĩthenya 40, na amaumĩlĩĩile isionĩ sya Kalilii na Yelusaleme. Ĩvindanĩ yĩu yonthe nĩwamamanyĩisye maũndũ ma vata na eeka syama mbingĩ. Na ĩndĩ Yesũ nĩwakomanie na atũmwa make ĩvinda ya mũthya Kĩĩmanĩ kya Mĩthata. Ĩvindanĩ yĩu ya mũthya, ameie atĩĩ: ‘Mũikaume Yelusaleme. Ĩkalai mweteele kĩla Asa ũmwathĩte.’

Atũmwa make mayaaelewa kĩla wawetaa. Kwoou mamũkũlilye atĩĩ: ‘Yu nũũtwʼĩka Mũsumbĩ wa Isilaeli?’ Nake Yesũ amasũngĩa atĩĩ: ‘Ĩvinda ya Yeova ti ĩviku nĩ kana nĩtwʼĩke Mũsumbĩ. O mĩtũkĩ, nĩmũũkwata vinya wa veva mũtheu, na mũkeethĩwa ngũsĩ syakwa. Endai mũkatavanyʼe Yelusaleme, Yutia, Samalia, na isionĩ sya vaasa sya nthĩ.’

Ĩtina wa ũu, Yesũ nĩwookĩlilwʼe yayayanĩ na ĩtu yamũvwʼĩka. O na kau amanyĩwʼa make nĩmaendeeie kũngʼeleela ĩũlũ, mayaamwona ĩngĩ.

Ũndũ ũsu wamina kwĩthĩwa, amanyĩwʼa nĩmaumie Kĩĩmanĩ kya Mĩthata na mathi Yelusaleme. Me vau, nĩmakomanĩaa kĩla ĩvinda nyũmbanĩ ya ĩũlũ na maivoya. Meekaa maũndũ asu meteele Yesũ amatavye ũndũ mekwĩka.