Jesu nĩ aacemanirie na arutwo ake Galili. Aamaheire watho ũyũ wa bata: ‘Thiĩi mũgatue andũ a mabũrũri mothe arutwo akwa. Marutagei maũndũ marĩa ndamũrutire na mũmabatithagie.’ Aacokire akĩmeera ũũ: ‘Ririkanai, ndĩkoragwo hamwe na inyuĩ hĩndĩ ciothe.’

Ihinda-inĩ rĩa thikũ 40 thutha wa Jesu kũriũkio, nĩ oimĩrĩire arutwo ake aingĩ mũno itũũra-inĩ rĩa Galili na Jerusalemu. Nĩ aamarutire maũndũ maingĩ na akĩringa ciama nyingĩ mũno. Jesu aacokire agĩcemania na arutwo ake riita rĩa mũico Kĩrĩma-inĩ kĩa Mĩtamaiyũ.

Jesu nĩ eerĩte atũmwo ake ũũ: ‘Mũtikoime Jerusalemu. Thiĩi na mbere gweterera kĩrĩa Awa aamwĩrĩire.’ No matiataũkĩirũo nĩ ũrĩa eendaga kuuga. Maamũririe ũũ: ‘Ihinda-inĩ rĩrĩ nĩrĩo ũgũtuĩka Mũthamaki wa Isiraeli?’ Nake akĩmeera: ‘Ihinda rĩa Jehova rĩa kũndua Mũthamaki ti ikinyu. Ihinda rĩtarĩ kũraihu nĩ mũrĩamũkĩra hinya wa roho mũtheru, na nĩ mũgatuĩka aira akwa. Thiĩi mũkahunjie Jerusalemu, Judea, Samaria, na nginya ituri ciothe cia thĩ.’

Jesu aacokire akĩoywo na igũrũ na akĩhumbĩrũo nĩ itu. Arutwo ake maaikarire marorete igũrũ, no nĩ aathiĩte.

Arutwo nĩ moimire Kĩrĩma-inĩ kĩa Mĩtamaiyũ na magĩthiĩ Jerusalemu. Nĩ maacemanagia kaingĩ thĩinĩ wa ngoroba ĩmwe na makahoya. Meetagĩrĩra Jesu amahe ũtongoria makĩria.