Mu ixi ia Ngalileia, Jezú ua di sange ni maxibulu mê. Muene ua a bhana kitumu kia dikota: ‘Ndenu mua bhange maxibulu akua jixi joso. Mu a longa kualuka o ima ioso i nga mi longo eme, ni kua batizala.’ Mu ku suluka muene ua a kanena: “Talenu, eme-muène ngà kala ni enu izuua ioso.”

Ku 40 a izuua a bhiti Jezú mu ixi kioso kia fukunuka, ua tukuluka ku ji hama ja maxibulu mê mu Ngalileia, ni Jeluzaleme. Muene ua a bhana milongi ia katunda, ni ku bhanga madiuanu avulu. Mu ku suluka, Jezú ua diongeka ni maxibulu mê ku Mulundu ua Midiva mu veji ia sukina. Muene ua a tendelesa: ‘Mu Jeluzaleme ki mu tunde-mu, maji mu kinga momo o kikutu kia mi kanena Tata.’

Jipoxolo ka tendela kiambote, ia kexile mu zuela. Ene a mu ibhuidisa: ‘Thembu íii iene i ua-nda kala Sobha ia Izalaiele?’ Jezú uambe: ‘Ki kiene lua o kizuua kia xindi Jihova phala eme ku kala Sobha. Kua kambe ngó, mua-nda tambula kutena kua nzumbi ikola, mua ka ngi kalela jimbangi. Ndenu mua boke mu Jeluzaleme, ni mu Judeia, ni mu Samádia, katé ku maxokololo ma jixi.’

Mu kithangana kieniókio Jezú ua zangumuka bhulu, anga bhu kala dituta dia tambula-nê ku mesu. Maxibulu a mu tonginina maji a lémbua ku mu mona dingi.

O maxibulu a xisa o Mulundu ua Midiva, anga aia ku Jeluzaleme. Ithangana ioso, ene akexile mu diongeka ni ku samba kumoxi mu inzo ia thandu. Ene akexile mu kingila dingi milongi iéngi ia Jezú.