LUFUNJISHO 93
Yesu Wabwela Mwiulu
Ku Ngalilea, Yesu koko ataine baana banji ba bwanga. Wibapele mukambizho wanema bingi wa kuba’mba: ‘Yainga na kufunjisha bantu bonse ba mu ntanda. Kwibafunjisha bintu byonse byo ne mufunjisha ne kwibabatizha.’ Kepo ebalayile’mba: ‘Vulukainga’mba, nkekala nenu kimye kyonse.’
Yesu wamwekele ku baana banji ba bwanga bavula mu Ngalilea ne mu Yelusalema byo papichile moba 40 kufuma po bamusangwile. Wibafunjishe bintu byanema bingi ne kuba bya kukumya byavula. Yesu wasambakene na batumwa banji japelako, ku Mutumba wa Maolivi. Waambile’mba: ‘Kange mukafume mu Yelusalema ne. Mukatwajijile kupembelela bimulaya Batata.’
Baana banji ba bwanga kechi baumvwine mwatajile byambo byaambile Yesu ne. Bamwipwizhe’mba: ‘Nanchi pano musakwikala Mfumu wa bena Isalela nyi?’ Yesu waambile’mba: ‘Kimye kya Yehoba kikyangye kufika kya kuba’mba ngikale Mfumu. Katatakatu mukatambule mupashi wazhila kabiji mukekala bakamonyi bami. Yainga mukasapwile mu Yelusalema, Muyudea, mu Samaliya ne mu mapunzhatu akwabo mwaya ntanda.’
Kepo Yesu ayile mwiulu ne kuzhimañana mu makumbi. Baana banji ba bwanga batajilengatu mwiulu, kufikatu ne kimye Yesu kyo azhimañene.
Baana ba bwanga bafumine ku Mutumba wa Maolivi ne kuya ku Yelusalema. Kimye kyonse bayanga mu kibamba kyapeulu na kulomba. Bapembejilenga Yesu kwibabula bya kuba.
“Kabiji ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mateo 24:14
Mwakonsha Kutemwa
YESU?—YE JISHINDA, BUKINE, NE BUMI
Bantu Bavula Bamumwene Kijiilo kya Pentekosita Saka Kikyangye Kufika
Yesu byo asangwilwe kabiji saka akyangye kuya mwiulu, wabwezhezhepo kubuula baana banji ba bwanga kintu kyo bakatambula ne byo bakekingijishanga.
