Mɛɛ Chiisu komal buɛiyaa nduaa Kalili, mbo ke nda wali sɔvɛ sɔviɔɔ le tosaa. Mbo dimul nda aa: ‘La kɔ mi la siiŋguu waŋnda buɛiyaa ni ba o ba fee o chieeŋndo choo. La pɛɛku nda nyɛ ya pɛɛku nya wo. Nduyɛ mi la yiŋ nda.’ Okoŋ, mbo chuel nda buŋgɛi aa: ‘La loonuŋ, I cho wa lɔɔlɔɔ a nya latulu.’

Mɛɛ Chiisu miiŋgu yoomu, mbo tosa palɛi 40 o chieeŋndo choo malaŋ o miiŋguŋ choo choo. A boondii keŋ, mbo fula buɛiyaa nduaa bɔɔbɔɔ o hɔl o kɛmɛlaŋ niŋ o Kalili niŋ a Chulusalɛm. Mbo pɛɛku nda sɔɔŋ sɔvɛ sɔviɔŋ, nduyɛ mbo tosa kaamaala bɔɔbɔɔ. Okoŋ kɔɔli, mi Chiisu bii bɔŋaŋ mɛɛlaa a kiilaa nduaa o Pembii Ɔlifiive choo. Mbo dimul nda aa: ‘La faŋaŋ Chulusalɛm te. La lo loŋ haaa mi Finya nuu ke nya nyɛ o chuel nya buŋgɛiyo.’

Kiilaa nduaa bii nyɛ o dimi wo bila le. Le hei, ma nyuna ndu aa: ‘Baa suŋ suŋ ŋ cho simnɔŋ Masaa le Isɔluɛi ni?’ Mi Chiisu mulul nda aa: ‘Teleŋ Chɛhowaa fuuluu wɔ le mi simnuŋ Masa le. O teleŋ biŋgi bɛŋgu, nyina Mɛlɛkaa cho nya kpaayaa ke. Nduyɛ la cho seileŋ timbi a ya okɔɔ. La kɔ dimi yooŋgu kɛndɔɔ Chulusalɛm, Chudiaa, Sameeliaa vɛlɛ a fondaŋnda leviltaŋ o chieeŋndo choo.’

Okoŋ, mi Chiisu helnuŋ o choo choo niŋ. Mi yumbu yumboo kumbu ndu. Buɛiyaa nduaa lo ndu tofaa haaa mbo kuaŋnuŋ.

Mi buɛiyaa nduaa faŋaŋ o Pembii Ɔlifiive choo, ma miiŋguŋ Chulusalɛm. Teleŋnda bɔɔbɔɔ, mi ndaa chuuŋgiaŋ o chiɛi choo choo wo niŋ le piɛileŋ. A wa chumndo le mi Chiisu ndoo chɔɔlu nda nɛila chɔmaalaŋ ke.