တၢ်မၤလိ ၉၃
ယ့ၣ်ၡူးက့ၤထီၣ်ဆူမူခိၣ်
ယ့ၣ်ၡူးထံၣ်လိာ်အသးဒီး အပျဲၢ်အဘီၣ်တဖၣ် လၢကီၢ်ကၤလံၤလါအပူၤန့ၣ်လီၤ. ယ့ၣ်ၡူးဟ့ၣ်လီၤအဝဲသ့ၣ် တၢ်မၤလိာ်အရ့ဒိၣ်တခါလၢ– ‘လဲၤဒုးကဲထီၣ် ပှၤကိးကလုာ်ဒဲး လၢယပျဲၢ်ယဘီၣ်တက့ၢ်. သိၣ်လိသီလိအဝဲသ့ၣ် ကယဲၢ်တၢ်လၢယသိၣ်လိသု ဒီးဘျၢအဝဲသ့ၣ်လၢထံတက့ၢ်.’ ဝံၤဒီး ယ့ၣ်ၡူးအၢၣ်လီၤအဝဲသ့ၣ်လၢ– ‘သ့ၣ်နီၣ်ထီၣ်က့ၤလၢ ယကအိၣ်ဒီးသုထီဘိန့ၣ်တက့ၢ်.’
ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤဝံၤအလီၢ်ခံလၢ အသီ ၄၀ အတီၢ်ပူၤန့ၣ် အဝဲလီၣ်ဖျါထီၣ်အသးလၢ အပျဲၢ်အဘီၣ်လၢအကယၤတဖၣ် အမဲာ်ညါလၢ ကၤလံၤလါဒီး ယရူၤၡလ့ၣ်အပူၤလီၤ. ယ့ၣ်ၡူးသိၣ်လိအဝဲသ့ၣ် လၢတၢ်မၤလိအရ့ဒိၣ်တဖၣ် ဒီးမၤဝဲတၢ်လီၤလးအါမံၤလီၤ. ဝံၤဒီး ယ့ၣ်ၡူးထံၣ်လိာ်အသးဒီး အတၢ်မၢဖိတဖၣ် အလီၢ်ခံကတၢၢ်တဘျီ လၢကစၢၢ်သ့ၣ်စၤယံးအလိၤလီၤ. ယ့ၣ်ၡူးတဲဘၣ်အဝဲသ့ၣ်လၢ– ‘ဟးထီၣ်လၢယရူၤၡလ့ၣ်အပူၤတဂ့ၤ. အိၣ်ခိးတၢ်လၢ ပၢ်အၢၣ်လီၤအီလီၤဝဲလၢ အကဟ့ၣ်လီၤသုန့ၣ်တက့ၢ်.’
ယ့ၣ်ၡူးအဲၣ်ဒိးတဲဝဲ အခီပညီဒ်လဲၣ်န့ၣ် အတၢ်မၢဖိတဖၣ်တနၢ်ပၢၢ်ဝဲဘၣ်. အဝဲသ့ၣ်သံကွၢ်အီၤလၢ– ‘နကကဲထီၣ် အံၣ်စရ့လးအစီၤပၤခဲအံၤဧါ.’ ယ့ၣ်ၡူးတဲဝဲလၢ– ‘ယဟိဝၤယွၤ ကဒုးကဲထီၣ်ယၤလၢ စီၤပၤန့ၣ် တၢ်ဆၢကတီၢ် တဘၣ်ဒံးဘၣ်. တယံာ်လၢၤဘၣ်န့ၣ် သုကဒိးန့ၢ်ဘၣ်သးစီဆှံ ဒီးသုကကဲထီၣ် ယပှၤအုၣ်အသးတဖၣ်လီၤ. လဲၤစံၣ်တဲၤတဲလီၤတၢ်လၢ ယရူၤၡလ့ၣ်, ကီၢ်ယူဒၤ, ၡၤမရံ ဒီးလၢဟီၣ်ခိၣ်ဒီဘ့ၣ်န့ၣ်တက့ၢ်.’
ဝံၤဒီး ယ့ၣ်ၡူးက့ၤထီၣ်ဆူမူခိၣ် ဒီးတၢ်အၢၣ်ကျၢၢ်ဘၢအီၤလီၤ. အဃိ ယ့ၣ်ၡူးအတၢ်မၢဖိတဖၣ် ကွၢ်ထီၣ်ဆူမူခိၣ် ဘၣ်ဆၣ် တထံၣ်ယ့ၣ်ၡူးလၢၤဘၣ်.
ယ့ၣ်ၡူးအပျဲၢ်အဘီၣ်တဖၣ် ဟးထီၣ်ကွံာ်ဝဲလၢ ကစၢၢ်သ့ၣ်စၤယံးအလိၤ ဒီးလဲၤဝဲဆူယရူၤၡလ့ၣ်အပူၤလီၤ. ညီနုၢ်န့ၣ် အဝဲသ့ၣ်ဟဲပာ်ဖှိၣ်လိာ်အသးလၢ ဒၢးတဖျၢၣ်လၢဟံၣ်ဖီခိၣ် ဒီးဃ့ဘါထုကဖၣ်တၢ်တပူၤဃီလီၤ. အဝဲသ့ၣ်အိၣ်ခိးဝဲဒ်သိး ယ့ၣ်ၡူးကဟ့ၣ်လီၤအဝဲသ့ၣ် တၢ်ဟံးစုနဲၣ်ကျဲလၢ ခါဆူညါအဂီၢ်လီၤ.
“ဘီမုၢ်အတၢ်သးခုအကစီၣ်အံၤ, ကဘၣ်တၢ်စံၣ်တဲၤတဲလီၤအီၤ လၢဟီၣ်ခိၣ်ဒီဘ့ၣ်ညါ, လၢတၢ်အုၣ်အသးလၢ ပှၤကလုာ်ခဲလၢာ်အဂီၢ်လီၤ. တုၤနုၤတစုတၢ်အကတၢၢ်န့ၣ် ကဟဲဘၣ်ဝဲလီၤ.”—မးသဲ ၂၄:၁၄