TUTO 93
Jesu Ukutela Kwa Lihalimu
Jesu akopana ni balutiwa bahae mwa Galilea. Abafa taelo ya butokwa hahulu, ali: ‘Hamuye mi mueze balutiwa mwa lifasi kaufela. Mubalute lika zeni milutile, mi mubakolobeze.’ Cwale abasepisa ali: ‘Muhupule kuli, nikaba ni mina kamita.’
Mwahalaa mazazi a 40 hamulaho wa zuho yahae, Jesu naaiponahalize kwa balutiwa bahae babañata mwa Galilea ni mwa Jerusalema. Naabalutile lituto za butokwa mi naaezize limakazo zeñata. Cwale Jesu akopana ni balutiwa bahae lwa mafelelezo fa Lilundu la Likota za Olive. Ali ku bona: ‘Musike mwazwa mwa Jerusalema. Muzwelepili kulibelela zasepisize Ndate.’
Baapositola bahae nebasika utwisisa zanaatalusa Jesu. Bamubuza kuli: ‘Kana ukaba Mulena wa Isilaele ka nako ya cwale?’ Jesu kihaa li: ‘Nako ya Jehova haisika fita kale kuli nibe Mulena. Honacwale-cwale fa, mukaamuhela maata ka moya okenile, mi mukaba lipaki zaka. Hamuye mukutaze mwa Jerusalema, Judea, Samaria, ni kwa libaka za kwahule hahulu za lifasi.’
Hasamulaho, Jesu aangelwa mwa mbyumbyulu mi lilu lamupata. Balutiwa bahae bazwelapili kutalimela mwahalimu, kono naasabonahali.
Balutiwa bazwa fa Lilundu la Likota za Olive mi baya kwa Jerusalema. Nebakopananga mwa muzuzu wa kwahalimu ni kulapela hamoho. Nebalibelela ku Jesu kuli abafe litaelo zeñwi.
“Taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”—Mateu 24:14
Hape Mwendi Mwakona Kutabela Litaba Ze
JESU KI YENA NZILA, NITI, NI BUPILO
Batu Babañata Babona Jesu Pili Lizazi la Pentekota Lisika Fita Kale
Kuzwa fazusezwa Jesu kuisa fa kambamela kwa lihalimu, naakuta-kutezi kubulelela balutiwa bahae nto yebaka amuhela ni mobaswanela kuitusiseza yona.
