KIFUNDWA 93
Yesu Wajokela Mūlu
Yesu wāketene na balondi bandi mu Ngadilea. Wēbapa musoñanya mukatampe bininge amba: ‘Endai mukalonge bana ba bwanga mu bantu ba mu matanda onso. Mwibafundijei bintu byonemufundije, ne kwibabatyija.’ Kupwa, wēbalaa’mba: ‘Vulukai amba, nkekala nenu nyeke.’
Yesu pa kupwa kusanguka, wāmwekēle bandi bana ba bwanga tutwa na tutwa mu Ngadilea ne mu Yelusalema, mu bula bwa mafuku 40. Wēbafundije bufundiji bwa kamweno ne kulonga bingelengele bivule. Kupwa, Yesu wētana na batumibwa bandi musunsa wa mfulo ku Lūlu lwa Impafu. Wēbanena’mba: ‘Kemwakitambai mu Yelusalema. Ilaijai’nka kwilaija byobya bilaile Tata.’
Batumibwa bandi kebāivwanijepo byaādi ukimba kunena. Bāmwipangula’mba: ‘Le pano kobikala bu Mulopwe wa Isalela?’ Yesu wēbanena’mba: ‘Kitatyi kya Yehova kumbikika bu Mulopwe kekyabwene. Panopano ponka musa kutambula bukomo bwa mushipiditu ujila, kadi musa kwikala bami batumoni. Endai mukasapule mu Yelusalema, mu Yudea, mu Samadia, ne mu bifuko bya kulampe bya pano pa ntanda.’
Kupwa, Yesu wākanda mūlu ne dikumbi dyāmupūta. Bandi bana ba bwanga bāshala batala’nka kutala mwaenda, ino aye wāya.
Bandi bana ba bwanga bātaluka ku Lūlu lwa Impafu bāenda ku Yelusalema. Bādi bebungila pamo kitatyi ne kitatyi mu kyumba kya pangala, ne kulombela. Bādi batengele Yesu ebape bulombodi bukwabo.
“Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya.”—Mateo 24:14
Tala'po Bidi ne Bino:
YESU—DISHINDA, BUBINE, NE BŪMI
Bavule Abamumone Kumeso kwa Pentekosa
Pa bukata bwa kusanguka kwandi ne kukanda mūlu, Yesu wakomeneja kine kikatambula bandi bana ba bwanga ne muswelo wa kwikingidija.
