Ok tchmon tibʼ Jesús toj Galilea kyukʼil t-xnaqʼtzbʼen. Xi tqʼoʼn jun kawbʼil kye aju nim toklen: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon. Kyxnaqʼtzanxe kye tkyaqilju ma txi nxnaqʼtzane kyeye ex tuʼn tjaw aʼ kywiʼ kyuʼne». Yajxitl xi ttziyen jlu kye: «Kynaʼntze, kukx chin tele kyukʼile».

Tej otoqxi jaw anqʼin Jesús, kubʼ tyekʼin tibʼ kywitz nim syent t-xnaqʼtzbʼen toj Galilea ex toj Jerusalén kyoj 40 qʼij. Xi t-xnaqʼtzaʼn nim tiʼchaq nim toklen kye ex bʼant nim milagr tuʼn. Yajxitl, ok tchmon tibʼ mankbʼil maj kyukʼil t-apóstol twi witz Olivos. Otoq txi tqʼamaʼn Jesús jlu kye: «Ax che tenkje tzalu tuj tnam Jerusalén. Ax che yone tiʼjju tziyemaj kyeye tuʼn Nmane».

Naʼmxtoq tel kynikʼ qe t-apóstol tiʼtoq t-xilen aju otoq txi tqʼamaʼn kye, tuʼntzunju xi kyqanin jlu te: «¿Kʼokela te aj kawil jaʼlo toj tnam Israel?». Xi ttzaqʼweʼn Jesús jlu kye: «Nya taj Jehová tuʼn woke te aj kawil jaʼlo. Noqtzun tuʼnj, toj chʼintl ambʼil tzul kykʼamoʼne xewbʼaj xjan ex tzul tqʼoʼn kyipumale, ex che okele testiw wiʼje. Tuʼntzunju kyxiʼye pakbʼal toj tnam Jerusalén, toj Judea, toj Samaria, ex toj tkyaqil twitz Txʼotxʼ».

Jaxtzun Jesús toj kyaʼj ex mintiʼ qʼanchaʼlix tuʼn muj. In che keʼyin qe t-xnaqʼtzbʼen tiʼj, noqtzun tuʼnj, kubʼ naj.

E ikʼ bʼet qe t-xnaqʼtzbʼen Jesús twi witz Olivos ex meltzʼaj toj Jerusalén. Naqʼliqetoq tuʼn tok kychmon kyibʼ ex tuʼn kynaʼn Dios toj jun kwart tibʼaj jun ja. In che yontoq tuʼn ttzaj tqʼoʼn Jesús junjuntl tqanil kye.