Zezi ti zwenn so bann disip dan Galile. Li ti donn zot enn lord bien inportan: ‘Ale ek fer bann disip dan tou bann pei. Ansegn bann dimounn bann kitsoz ki mo finn ansegn zot, ek batiz zot.’ Apre sa, li ti fer zot sa promes-la: ‘Pa bliye, mo pou touletan avek zot.’

Apre so rezireksion, pandan 40 zour, Zezi ti aparet avek plizir santenn disip dan Galile ek Zerizalem. Li ti ansegn zot bann leson inportan ek li ti fer boukou mirak. Lerla, Zezi ti zwenn so bann zapot enn dernie fwa lor mont des Oliviers. Li ti dir zot: ‘Pa kit Zerizalem. Kontign atann seki mo Papa finn promet.’

So bann zapot pa ti konpran seki li ti pe dir. Zot ti demann li: ‘Eski to pou vinn Lerwa Izrael asterla?’ Zezi ti reponn: ‘Pankor ariv ler pou ki Zeova fer mwa vinn Lerwa. Biento, zot pou gagn pwisans lespri sin, ek zot pou vinn mo bann temwin. Al pres dan Zerizalem, Zide, Samari, ek dan bann landrwa ki pli lwin lor later.’

Apre sa, Zezi ti mont dan lesiel ek enn niaz ti kasiet li. So bann disip ti kontign get lao, me li ti fini ale.

Bann disip ti desann mont des Oliviers ek zot ti al Zerizalem. Zot ti rasanble souvan dan enn pies lor letaz enn lakaz ek zot ti priye. Zot ti pe atann ki Zezi donn zot plis linstriksion.