Ta̱ Jesús nda̱kutáʼanra xíʼin na̱ discípulora chí ñuu Galilea. Ta ta̱xira iin chiñu káʼnu ndaʼa̱na ta ni̱ka̱ʼa̱nra: “Kúaʼanndó ta sanáʼa̱ndó ndiʼi na̱ yiví ña̱ ná kundiku̱nna yi̱ʼi̱. Sanáʼa̱ndóna ndiʼi ña̱ sa̱náʼi̱ ndóʼó ta sandákuchindóna”. Tasaá ni̱ka̱ʼa̱ntura: “Kǒo na̱ndósóndó, chi yi̱ʼi̱ íyoi̱ xíʼinndó ndiʼi tiempo”.

Tándi̱ʼi nda̱taku ta̱ Jesús, ki̱ʼva 40 ki̱vi̱ ki̱tara nu̱ú ku̱a̱ʼání na̱ discípulora ñuu Galilea xíʼin ñuu Jerusalén. Ku̱a̱ʼání ña̱ ndáyáʼvi sa̱náʼa̱rana ta ku̱a̱ʼá milagro ke̱ʼéra. Tándi̱ʼi, nda̱kutáʼanra xíʼin na̱ apóstolra nu̱ú yuku̱ ña̱ Olivo. Xa̱a̱ ni̱ka̱ʼa̱nra xíʼinna: “Koondó ñuu Jerusalén. Kundatundó ña̱ ni̱ka̱ʼa̱n yivái̱ taxira ndaʼa̱ndó”.

Na̱ apóstolra kǒo níkunda̱a̱-inina ndáaña kúni̱ra, ña̱kán ni̱ka̱ʼa̱nna xíʼinra: “¿Á xa̱a̱ koún rey na̱ ñuu Israel?”. Ta̱ Jesús ni̱ka̱ʼa̱nra: “Va̱ása kúni̱ Jehová ña̱ koi̱ rey vitin. Ndáa loʼova kúma̱ní ña̱ taxira espíritu santo ndaʼa̱ndó ta ña̱yóʼo taxi ndée ndaʼa̱ndó, ta koondó testigoi̱. Xa̱ʼa ña̱yóʼo kúaʼanndó natúʼunndó ñuu Jerusalén, ñuu Judea, ñuu Samaria xíʼin iníísaá ñuyǐví”.

Tasaá ku̱a̱ʼa̱nra chí ndiví ta ni̱sa̱ʼvira chí sa̱tá vikó. Na̱ discípulora xítona chí ndiví, ta kǒokara níxinina.

Tándi̱ʼi, na̱ discípulora ke̱ena chí yuku̱ Olivo ta ku̱a̱ʼa̱nna chí ñuu Jerusalén. Kán xi̱ndakutáʼanna ta xi̱keʼéna oración ini cuarto ña̱ íyo chí xi̱ni veʼe. Ta ndátuna ka̱ʼa̱nka ta̱ Jesús xíʼinna ndáaña keʼéna.