Jesús mosentilik ininuaya itokilijkauaj ipan Galilea. Kinmakak se tlanauatili tlen tlauel ipati: “Xiakaj, uan xijchiuakaj ma elikaj notokilijkauaj maseualmej tlen nochi altepemej, xikinmachtikaj ma kineltokakaj nochi tlen niinmechmachtijtok uan xikinatsonpoliuiltikaj”. Teipa kiniljuik: “Xikilnamikikaj, na nochipa niitstos inmouaya”.

Kema Jesús ya moyolkuitoya, monextik 40 tonali ininixpa miakej itokilijkauaj ipan Galilea uan ipan Jerusalén. Kinmachtik miak tlamantli tlen tlauel ipati uan kichijki miak uejueyi tlamantli. Kema Jesús nechka tlakuepiliskia iluikak, mosentilik ininuaya itokilijkauaj ipan tepetl Olivos. Jesús kiniljuijtoya: “Amo xikisakaj tlen Jerusalén. Xijchiakaj tlen noTata kitenkajtok inmechmakas”.

Itokilijkauaj amo kikuamachilijkej tlake kiijtosnekiyaya, yeka kitlajtlanijkej: “¿Ya peuas titlanauatis ipan Israel?”. Jesús kinnankilik: “Jehová ayamo kineki ma nitlanauati. Nechka toTeotsij inmechmakas itonal uan inkipiasej chikaualistli, uan intlayolmelauatij tlen na. Yeka xiakaj xitlajtolmoyauatij ipan Jerusalén, Judea, Samaria uan ipan sekinok altepemej tlen tlauel uejka”.

Uajka Jesús tlejkok iluikak, uan se mixtli kitsajki. Itokilijkauaj ajkotlachixtoyaj, uan teipa ayokmo kiitakej.

Teipa, itokilijkauaj kistejkej tlen tepetl Olivos uan tlakuepilijkej Jerusalén. Nopaya ipa mosentiliyayaj uan momaijtouayayaj uejkapa ipan se kali. Kichixtoyaj Jesús ma kinmatilti tlake monekiyaya kichiuasej.