Jesús mosentilij iniuan imomachtijkauan ompa Galilea. Kinnauatij se taman tein motelneki: “Xiyakan uan noyampa xikinpaleuikan taltikpakneminij maj no mochiuakan nomomachtijkauan. Xikinmachtikan nochi tein namechmachtij uan xikinauikan”. Satepan motenkauak: “Xikelnamikikan, nejua nochipa niyetos namouan”.

Satepan ke moajokuik, Jesús monextij 40 tonalmej ininixpan miakej imomachtijkauan ompa Galilea uan Jerusalén. Kinmachtij miak taman tein motelneki uan kichiuak miak uejueyi tachiualismej. Satepan, mosentilij iniuan itatitaniluan itech tepet tein itokay Olivos. Jesús kiniluij: “Ximokauakan Jerusalén. Xiksentokakan xikchiakan tein noTajtsin motenkauak”.

Itatitaniluan amo kiajsikamatkej tein kijtosnekik Jesús, yejua ika kitajtanijkej: “¿Timochiuatiya titekiuaj itech xolal Israel?”. Jesús kinnankilij: “Jiova ayamo kiixtalia maj nipeua nitekiuajti. Sayoj ke amo uejkaua nankiseliskej yektikatsin espíritu tein namechpaleuis xikpiakan chikaualis, uan nanyeskij nannotaixpantijkauan. Yejua ika xitanojnotsatij Jerusalén, Judea, Samaria uan hasta kampa okachi uejka”.

Ompa, Jesús pankisak iluikak, uan se mixti kiixtsakuak. Imomachtijkauan ajkotachixtoyaj, sayoj ke amo kiitakejok.

Imomachtijkauan temokej itech tepet uan mokepkej Jerusalén. Ajko itech se kali mosentiliayaj uan kitataujtiayaj Dios. Kichiayaj maj Jesús kinmatiltiani okachi taman tein kichiuaskiaj.