Jesus wavasa ovalongwa vae mo Galileia. Weveavela otyitumino tyimwe tyakolela tyati: ‘Endei, kalongesei ovanthu movilongo aviho. Velongesei okutavela ovipuka aviho ame nemutuma iya amuvembatisala.’ Tupu evelae okuti: ‘Hinangelei, ame apeho ndyikahi nonwe.’

Mokueenda kuononthiki 40 etyi atutiliswa, Jesus wamonekelele ovalongwa vae ovanyingi mo Galileia no mo Jelusalei. Wevelongesile ovipuka vimwe viakolela iya tupu walingile omahuviso omanyingi. Konyima Jesus eliongiya novalongwa vae otyikando tyahulilila-ko Komphunda Yomindyambi. Wapopia okuti: ‘Muhatundei mo Jelusalei. Tualeiko okukevelela etyi Tate emulaa.’

Ovalongwa vae avahanoñgonoka etyi Jesus apopia. Avemupulu okuti: ‘Mokala Ohamba yo Isilayeli pahetyino?’ Jesus akumbulula okuti: ‘Ou hamuvo-ko wa Jeova opo andinge Ohamba. Mahi, tyina ospilitu sandu yamemulaukila, onwe mamupewa epondolo amukala onombangi mbange. Endei kaivisei ko Jelusalei no ko Judeia no ko Samaria, alo kononthele mbokokule-kule mbohi.’

Konyima Jesus ahimbika okuenda no keulu iya ekaka limwe alimuhiki. Ovalongwa vae avatualako okutala keulu, mahi Jesus ahamoneka vali.

Ovalongwa avatundu Komphunda Yomindyambi iya avaende no ko Jelusalei. Ankho apeho veliongiya mondyuo imwe otyo velikuambela. Ankho vakevelela opo Jesus eveavele vali onondonga ononkhuavo.