Diad Galilea, akinengneng si Jesus ed saray papatumbok to. Imbaga tod sikara iyan importantin maong ya ganggan: ‘La kayo, tan ibangat yo ray totoo ed amin ya bansa pian magmaliw iran disipulok. Ibangat yod sikara so amin ya imbangat kod sikayo, tan bautismoan yo ra.’ Insan im-promise to: ‘Tandaan yo, lanang ta kayon tulongan.’

Legan na 40 ya agew kayari imbilay lamet nen Jesus, sikatoy nampanengneng ed nilasus ya disipulo diad Galilea tan Jerusalem. Dakel so importantin imbangat tod sikara tan nanggawa na amayamay ya milagro. Insan akinengneng si Jesus ed saray apostol to diad Palandey na Saray Olibo tan atan la so sampot. Imbaga tod sikara: ‘Agkayo ontataynan ed Jerusalem. Alagar yo imay im-promise nen Amak.’

Agnatalosan na saray apostol no antoy labay ton ibaga. Tinepet dad sikato: ‘Magmaliw ka lan Ari na Israel?’ Imbaga nen Jesus: ‘Agni asabi panaon nen Jehova pian gawaen to ak ya Ari. Magano yo lan naawat so masanton espiritu kanian nawalaan kayoy pakayari, tan magmaliw kayon tasik. Manpulong kayo ed Jerusalem, Judea, Samaria, tan anggad sankaarawian ya lugar diad dalin.’

Kayari to man, tinmagey lay Jesus paarap ed tawen insan la sinaniban na lurem. Akatangay nin siansia iray disipulo to, balet agda la nanengneng.

Inmalis lad Palandey na Saray Olibo iray disipulo tan linma rad Jerusalem. Manlapud saman, lanang la ran mantitipon tan manpipikasi diad kuarto ed tagey na sakey ya abung. Aalagaren da no wala ni ray arum ya ibilin nen Jesus ed sikara.