Jesusca Galileapimi discipulocunahuan tandanacurca. Chaipimi, ‘tucui cai pachata richij, ñuca catijcunata ruraichij. Tucui imalla mandashcacunata yachachishpa bautizaichij’ nirca. Qꞌuipaca, ‘cancunataca manataj saquishachu, chaitaca amataj cungaringuichijchu’ nircami.

Jesús causarishpaca Galileapi, Jerusalenpimi 40 punllacunacama achca discipulocunapaj ñaupajpi ricurirca. Shinallataj valishca consejocunatami curca. Achca milagrocunatapishmi rurarca. Ña ultimotami Olivos urcupi paita catijcunahuan tandanacurca. Jesusca, ‘ñuca Yaya imata cusha nishcata cungacama, Jerusalenmanta amaraj ringuichijchu’ nircami.

Imata nicushcata mana intindishpami apostolcunaca, ‘¿cunanllatajchu Israel llajtata mandagringui?’ nircacuna. Chaimi Jesusca, ‘ñuca Mandaj cachunca Jehová Diosca manaraj munanchu. Pero cancunaca ñallami espíritu santota chasquishpa imatapish rurai tucunguichij. Chaimanta Jerusalenpi, Judeapi, Samariapi, tucui llajtacunapipish ñucamantami huillanguichij’ nirca.

Qꞌuipaca Jesús jahua pachaman huichiyajpimi pꞌuyu taparca. Discipulocunaca huichilla ricushpami saquirircacuna. Chaipimi Jesusca chꞌingarirca.

Discipulocunaca Olivos urcumantami Jerusalenman tigrarcacuna. Chai llajtapimi shuj huasi jahua pisopi tandanacujcuna carca. Diostapish mañajcuna carca. Ashtahuanpish ima shina huillanata, congregacionta ima shina pushanata Jesús yachachichunmi shuyarcacuna.