Galileapim qatiqninkunata huñuruspan Jesusqa kaynata kamachirqa: “Llapallan nacionpi runakunaman rispayá yachachimuychik qatiqniykunaña kanankupaq, hinaspayá bautizamuychik”, nispa. Nirqaraqmi: “Ñuqaqa manam saqisqaykichikchu”, nispa.

Kawsariramuspanmi Jesusqa 40 punchaw rikuriykurqa Galileapi hinaspa Jerusalenpi achka qatiqninkunaman. Hinaspam aswanraq sumaqta yachachirqa, milagrokunatapas ruwarqam. Taytanman ripukunallanpaqñam Jesusqa Olivos muqupi apostolninkunata nirqa: “Jerusalenllapim kankichik nisusqaykichikta taytay qusunaykichikkama”, nispa.

Apostolninkunaqa Jesuspa chayna nisqanta mana entiendespankum tapurqaku: “¿Ñachu Israel runakunata kamachinkiña?”, nispa. Jesusñataqmi nirqa: “Taytaymi kamachinaypaqqa manaraq niwanchu. Ichaqa qamkunam chaskinkichikña chuya espirituta kallpayuq kanaykichikpaq. Hinaspam ñuqamanta willakunkichik Jerusalenpi, Judeapi, Samariapi hinaspa kay pachapa cantonkama”, nispa.

Chaymantam Jesusqa hanaq pachaman ripukurqa. Puyu taparuptinmi qatiqninkunaqa manaña rikurqakuñachu.

Jesuspa qatiqninkunañataqmi Jerusalenman kutirqaku, hinaspam sapa kuti huñunakusqankuman hina wasipa altosninpi huñunakuspanku Diosta mañakuqku. Chaynatam suyarqaku Jesuspa yachachikuyninta.