Galileapin Jesusqa discipulonkunawan juñukuran. Jinaspa juj importante kamachikuyta qoran, niranmi: “Riychis, jinaspa llapa llaqtakunapi discipuloykuna kanankupaq yachachimuspa bautizamuychis”, nispa. Prometerantaq paykunawan kashanallanpaq.

Kausarimpusqanmantaqa 40 p’unchayraqmi Jesusqa kay pachapi karan, chaypin discipulonkunaman rijuriran Galileapi Jerusalenpi ima. Imaymanata yachachispan milagrokunata ruwaran. Olivos orqopin Jesusqa apostolninkunawan juñukuran, chaymantaqa manañan rijuriranñachu. Jinaspa niran: “Amaraq Jerusalenmantaqa ripunkichischu. Suyakushallaychis Papaypa prometesqanta”, nispa.

Apostolninkunaqa manan entienderankuchu rimasqanta, chaymi tapuranku: “¿Israelpichu kamachikuyta qallarinki?”, nispa. Jesustaq niran: “Jehová Diosqa manaraqmi munanchu rey kanayta. Ichaqa pisi tiempollamantan santo espirituta chaskinkichis, jinaspa testigoykuna kankichis. Chhaynaqa predicamuychis Jerusalenpi, Samariapi, kay pachaq k’uchunkama”, nispa.

Jinan Jesusqa janaq pachaman oqarisqa karan, juj phuyutaq tapaykuran. Discipulonkunaqa qhawashallarankun, paymi ichaqa chinkaripuran.

Jinaspa Olivos orqomanta Jerusalenman kutipuranku. Chaypin altos cuartopi juñukushallaranku Diosmantapas mañakushallaranku ñaupaqpi ruwasqankuman jina. Suyarankutaq Jesuspa imachus ruwanankupaq kamachimunanta.