Jesusca Galilea llactapimi paipa catijcunahuan tandanajurca. Chaipimi Jesusca paipa catijcunataca mandarca: ‘Ñucapa yachajujcuna tucuchunmi, cai pachapi gentecunapaman rishpa villana canguichi. Ñuca tucui imatalla yachachishcataca, paicunamanbash yachachishpami bautizana canguichi’ nishpa. Jipaca nircami: ‘Ñucami tucui punllacuna cangunahuan casha’ nishpa.

Jesús causarishca jipaca, 40 punllacunatami ashtaca paita catijcunaman Galileapi, Jerusalén llactapipash ricurirca. Shinallata minishtirishca yuyaicunata yachachishpa, ashtaca milagrocunatapashmi rurarca. Ña último punllataca Olivos urcupimi paipa catijcunahuan ultimota Jesusca tandanajurca. Jesusca cashnami nishca carca: “Jerusalenmandaca na maimanbash rishpami, ñuca Taita cachamushapacha nishcata shuyanajuna canguichi” nishpa.

Jesuspa catijcunaca Jesús nishcataca na ali intindishcarcachu. Chaimandami cashna tapurca: Jesús, ¿cunan punllacunallatachu Israel llactataca mandagringui? nishpa. Chaimi Jesusca nirca: Jehová Diosca ñuca rey cachunga nara munanllu. “Ashtahuangarin Diospaj jucha illaj espíritu cangunapajman shamujpimi, ushaita japinguichi. Chai ushaihuanmi, Jerusalenbi, tucui Judea llactapi, Samaria llactapi, cai pacha tucuri manñacaman ñucamanda villagringuichi” nishpa.

Shina nijujpillatami, paicuna ricujta Jesusca jahua pachaman vichai rirca. Paitaca, fuyu quilpajpimi, paicunaca na ashtahuan ricui usharca.

Chai jipami, Olivos urcumanda, Jerusalenman tigranajurca. Paicunaca altibajo huasi jahuapimi tandanajushpa Diosta mañana costumbreta charin carca. Chaipimi imata ashtahuan ruranata Jesús yachachichun shuyanajurca.