О Исус аракхља пе пле следбениконцар ки Галилеја. Ов денѓа лен јекх важно заповед: „Џан хем керен ученикија таро мануша таро са о пхувја. Сикавен лен башо буќа со ме сикавѓум тумен хем крстинен лен“. Пало адава ветинѓа ленге: „Памтинен, секогаш ка овав туменцар“.

Откеда воскреснинѓа, ко периоди таро 40 диве о Исус појавинѓа пе буте учениконге ки Галилеја хем ко Ерусалим. Ов вакерѓа ленге важна поуке хем керѓа бут чудија. Пало адава, ки Маслинско Гора, о Исус последно пути аракхља пе пле апостоленцар.

Англедер адава, џикоте сине ко Ерусалим, о Исус вакерѓа ленге: „Ачховен ки акаја диз. Аџикерен те добинен адава со ветинѓа туменге мо Дад“. Ама, ола на халиле со мангља о Исус те вакерел адалеа. Адалеске пучле ле: „Акана ли ка ове цари ко Израел?“ О Исус одговоринѓа ленге: „Панда на ало о време со о Јехова одрединѓа ле те овав цари. Панда хари ка добинен сила таро свети дух хем ка овен манге сведокија. Проповединен ко Ерусалим, ки Јудеја, ки Самарија хем ко најдур тхана ки Пхув“.

Тегани о Исус почминѓа те џал упре ко небо. О ученикија дикхена сине ки лесте, хем таро јекх пути јекх облако учхарѓа ле хем више нашти сине те дикхен ле.

О ученикија геле песке тари Маслинско Гора хем геле ко Ерусалим. Ола редовно кхедена пе сине ко јекх кхер, молинена пе сине хем аџикерена сине о Исус те дел лен неве упатствија.