Yesuusi Galiilaho harunsaanosinni xaadino. Hakko heedheenna isi lowo geeshsha hasiissannota mitte hajajo hajajinonsa. Togo yiinonsa: ‘Hadhine manna baala rosaanoˈya asse. Ani rosiisoommoˈnere rosiissensa, hattono cuuˈensa.’ Hakkiinni, ‘Duuchanka woyite ani kiˈne ledo noommota qaagge’ yiinsa.

Yesuusi reyotenni kaihu gedensaanni 40 barri giddo, Galiilahonna Yerusaalamete lowo xibbe ikkitano rosaanosira leellino. Isi kaajja roso rosiisinonsa, hattono duucha maalale loosino. Hakkiinni Yesuusi goofimarchoho soqqamaasinesinni Ejedhete Ilaalira xaadino. Isi togo yiino: ‘Yerusaalametenni fultinoonte. Anniˈya uyino hexxo agadhe.’

Isi yiinori soqqamaasinesira dileellinonsa. Insa togo yite xaˈmitusi: ‘Israeelete Moote ikkattohu xaatini?’ Yesuusi togo yiinsa: ‘Yihowa Moote assannoe yanna dixaati. Mulenni qullaawu ayyaani wolqa adhitinanni; hakkiinni ane daafira farcidhinanni. Hadhine Yerusaalamete, Yihudaho, Samaariyahonna xeertote noo gobba baalate sabbakke.’

Hakkunni gedensaanni Yesuusi iimira hige haˈreenna gomichu guggushshisi. Rosaanosi iso laˈanni keeshshitino; isi kayinni haˈre kaino.

Rosaano Ejedhete Ilaalinni Yerusaalame hadhino. Insa mitto mine gamba yite duuchanka woyite huuccidhanno. Yesuusi biddishsha aannonsa yanna agadhitino.