LESONA 93
Toe Afio Iesu i le Lagi
Na feiloaʻi Iesu ma ona soo i Kalilaia. Na ia tuuina atu iā i latou se faatonuga tāua: ʻIa outou ō atu e fai tagata o nuu uma lava ma soo. Ia aʻoaʻo i latou i mea na ou aʻoaʻoina ai outou, ma papatiso i latou.’ Ona ia folafola atu lea: ʻIa manatua, ou te faatasi pea ma outou.’
A o faagasolo aso e 40 talu ona toe faatūina mai Iesu, na faaali atu o ia i le faitau selau o ona soo i Kalilaia ma Ierusalema. Na ia aʻoaʻo atu iā i latou lesona tāua ma faia vavega e tele. Ona feiloaʻi lea o Iesu ma ona aposetolo mo le taimi mulimuli i luga o le mauga o Olive. Na ia faapea atu: ʻIa aua neʻi outou ō ese mai i Ierusalema. Ia faatalitali pea i le mea na folafola mai e le Tamā.’
E leʻi malamalama ona aposetolo i le uiga o lana faamatalaga. Na latou fesili atu iā te ia: ʻPo o le a avea nei oe ma tupu o Isaraelu?’ Na tali mai Iesu: ʻE leʻi oo i le taimi a Ieova e tofia ai aʻu e avea ma Tupu. E lē o toe umi ona outou maua lea o le mana mai i le agaga paia, ma o le a fai outou ma molimau iā te aʻu. Ia talaʻi atu i Ierusalema, Iutaia, Samaria, ma tuluʻiga uma o le lalolagi.’
Ona aveina aʻe lea o Iesu i le lagi, ma ua ufitia o ia e se ao. Na vaavaai atu pea ona soo i le lagi, ae ua lē toe iloa atu o ia.
Na ō ese le ʻausoo mai i le mauga o Olive ma ō atu i Ierusalema. E masani ona latou faapotopoto i se potu i luga ma tatalo ai. Sa latou faatalitali iā Iesu mo nisi faatonuga.
“O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”—Mataio 24:14
E te Ono Fiafia Foʻi
IESU—LE ALA, LE UPU MONI MA LE OLA
Ua Vāai le Faitau Selau iā Iesu a o Leʻi Oo i le Penetekoso
Talu mai le taimi na toetū aʻe ai Iesu ma le taimi na afio aʻe ai o ia i le lagi, sa tele taimi na ia faamamafa atu ai i ona soo le mea o le a latou mauaina, ma le auala e tatau ona latou faaaogāina ai.
