Ngesikhatsi Jesu anebafundzi bakhe eGalile, wabaniketa umyalo lobalulekile, watsi: ‘Hambani nente bantfu bato tonkhe tive babe bafundzi bami, nibafundzise konkhe lenginiyale ngako futsi nibabhabhatise.’ Wase uyabetsembisa utsi: ‘Nibokwati kutsi mine nginani onkhe emalanga.’

Nasavusiwe, Jesu waba khona emalanga langu-40 futsi wabonwa bantfu labanyenti eGalile naseJerusalema. Wabafundzisa tintfo letibalulekile futsi wenta netimangaliso letinyenti. Jesu nebaphostoli bakhe bahlangana ndzawonye kwekugcina eNtsabeni Yemincuma. Watsi kubo: ‘Ningesuki eJerusalema, kodvwa chubekani nimele loko Babe lakwetsembisa.’

Baphostoli bakhe bebangati kutsi usho kutsini. Ngako bambuta batsi: ‘Sewutawuba yiNkhosi yaka-Israyeli yini?’ Jesu watsi: ‘Sisengakefiki sikhatsi sekutsi Jehova angente ngibe yiNkhosi. Kodvwa nine nitawutfola emandla nawufika kini umoya longcwele, futsi nitawuba bofakazi bami eJerusalema, kuyo yonkhe iJudiya neSamariya, nakuto tonkhe tincenye temhlaba.’

Ngemuva kwekusho letintfo, wenyuka babukile, futsi lifu lamsitsa bangasamboni. Bafundzi bakhe bachubeka babuke etulu, kodvwa besekahambile.

Ngako besuka eNtsabeni Yemincuma babuyela eJerusalema. Bebahlangana ndzawonye ekamelweni lelisetulu futsi bathantaze. Bebalindzele kutsi Jesu abatjele loko lokufanele bakwente.