Jesús nigimbíin xa̱bi̱i̱ náa Galilea. Nixnúún mbá ñajunʼ rí gíʼdoo wéñuʼ numuu: “Guʼgua̱ ga̱jma̱a̱ gusngún xúgínʼ xa̱bu̱ numbaaʼ. Gusngún xúgíʼ rí ikhúúnʼ nisngála ga̱jma̱a̱ guxuʼmíínʼ iyááʼ”. Nda̱wa̱á nikudaminaʼ rígi̱: “Garmáʼáan a̱jkia̱la rí ikhúúnʼ maxtáá má xúʼko̱ ga̱jma̱á nindxa̱la”.

Nda̱wa̱á rí nigabi̱i̱, Jesús nikujmaa mbá 40 mbiʼi náa mbaʼin xa̱bi̱i̱ náa Galilea ga̱jma̱a̱ náa Jerusalén. Niʼsngúún mbaʼa ikha rí gíʼdoo numuu ga̱jma̱a̱ niʼni mbaʼa milagro. Nda̱wa̱á xóó nigímbíin xa̱bu̱ imbóó miʼtsú náa kúbá ndrígóo Olivos. Jesús niʼthún: “Xágajnála náa Jerusalén. Guguaʼthi̱i̱n má xúʼko̱ rí Anu̱ʼ nikudaminaʼ”.

Apóstoles tákru̱ʼu̱u̱n rí Jesús niʼthí, ikha jngó niraxi: “Lá manindxa̱ʼ má rey náa Israel ráʼ.” Jesús niriʼña̱a̱: “Jeobá xóó tsíyoo rí ikhúúnʼ mani̱ndxu̱ʼ rey. Mú xájyúuʼ rí mudrígula xi̱ʼ kaʼwu rí maxnála tsiakii, ga̱jma̱a̱ mani̱ndxa̱la xa̱bi̱ʼ. Ikha jngó guʼgua̱ gúʼtaraʼa náa Jerusalén, náa Judea, náa Samaria ga̱jma̱a̱ asndu náa naguámbarigo̱o̱ ku̱ba̱ʼ”.

Ikhú, Jesús nitsima̱a̱ mekhuíí, ga̱jma̱a̱ niráʼa̱a̱ náa du̱u̱n. Xa̱bi̱i̱ niyexiraʼan mekhuíí, mú ikhú nindáti̱ga̱a̱.

Discípulos nigájnun náa kúbá ndrígóo Olivos ga̱jma̱a̱ nitangi̱i̱n náa Jerusalén. Ikhí naguʼún nagimbíi̱n náa i̱mba̱ guʼwá rí grígu rijma̱a̱. Niguáʼthi̱i̱n rí Jesús maxnún itháan ikha.