Iha Galileia, Jesus hasoru ninia dixípulu sira no fó sai mandamentu importante ida: ‘Laʼo bá no hanorin ema husi nasaun hotu atu sai haʼu-nia dixípulu. Hanorin sira buat neʼebé haʼu hanorin ona ba imi no fó batizmu ba sira.’ Tuirmai Jesus promete: ‘Hanoin-hetan, haʼu sei sempre hamutuk ho imi.’

Durante loron 40 depois Jesus moris hiʼas, nia mosu ba ninia dixípulu atus ba atus iha Galileia no Jeruzalein. Nia hanorin sira lisaun importante oioin no halo milagre barak. Tuirmai Jesus hasoru ninia apóstolu sira ba dala ikus iha Foho Oliveira. Nia dehan: ‘Keta sai husi Jeruzalein. Kontinua hein ba buat neʼebé Aman promete ona.’

Apóstolu sira la komprende buat neʼebé Jesus koʼalia. Sira husu: ‘Agora Ita sei sai Liurai ba Izraél ka lae?’ Jesus dehan: ‘Agora laʼós tempu neʼebé tuir Jeová nia hakarak atu haʼu sai Liurai. Lakleur tan, imi sei simu espíritu santu no sai haʼu-nia testemuña. Bá haklaken iha Jeruzalein, Judeia, Samaria, no mós rai sira neʼebé dook liu iha mundu.’

Tuirmai Jesus saʼe ba lalehan, no kalohan taka netik nia. Dixípulu sira kontinua hateke ba lalehan maibé labele haree tan nia.

Dixípulu sira fila fali ba Jeruzalein husi Foho Oliveira. Sira halibur hamutuk beibeik iha kuartu iha andár leten no halo orasaun. Sira hein hela Jesus atu fó matadalan liután.