Jesu wakaswaanana abatobeli bakwe kuGalilaya. Wakabapa malayilile ayandikana akuti: ‘Kamuya mukachite bantu bali munyika yoonse kuti babe basikwiiya. Mukabayiisye zintu nzindakamuyiisya alimwi mubabbabbatizye.’ Mpawo, wakabasyomezya kuti: ‘Amulange, ndinooli andinywe chiindi choonse.’

Nikwakiinda mazuba aali 40 Jesu kabusidwe, wakalibonia kuli basikwiiya bakwe biingi kuGalilaya akuJerusalemu. Wakabayiisya zintu ziyandikana akuchita malele miingi. Mpawo, Jesu wakabungana abasikwiiya bakwe kamamanino, kuChilundu chaMa-olifa. Jesu wakali wababuzya kale basikwiiya bakwe kuti: ‘Kamukkede muJerusalemu. Mukayinkilile kunembo kulindila eezyo Ndeende nzyaakasyomezya.’

Baapostolo bakwe teebakazimvwisisisya pe zyakaambidwe aJesu. Bakamubuzya kuti: ‘Uyooba Mwaami waIsrayeli na lino?’ Jesu wakati: ‘Tachinasika chiindi chaJehova chakuti ndibe Mwaami. Lino-lino, muyoojana manguzu kuzwa kumuuya uusalala alimwi muyooba bakamboni bangu. Mweelede kukambawuka kuJerusalemu, kuJudaya, kuSamariya akumasena aali kule loko aanyika.’

Mpawo Jesu wakasumpulwa kaya kujulu alimwi wakavumbwa amayoba. Basikwiiya bakwe bakachili kumulanga, pesi wakali wabbila.

Basikwiiya bakazwa kuChilundu chaMa-olifa mpawo bakaya kuJerusalemu. Bakali kubungana antoomwe akukomba mung’anda yamujulu. Bakali kulindila kuti Jesu abape amwi malayilile.