Ja Jesús stsomo ja snebʼumanik bʼa Galilea. Yayi jun mandar jel tʼilan: «Kaʼaxik sok awik och nebʼumanik ja ixuk winiki bʼa spetsanil ja lugari. Jeʼawikyi yibʼanal ja jastik jeʼunej awilexi sok awik yiʼe jaʼ». Tsaʼan skʼapa: «Ajuluka kʼujolex, tolabida ti oj ajyukona mokexa».

Tsaʼan yajni sakʼwita, bʼa 40 kʼakʼu ja Jesús sjeʼa sbʼaj sok jitsan snebʼumanik ja bʼa Galilea sok bʼa Jerusalén. Sjeʼayi sjejelik jel tʼilanik sok skʼulan jitsan milagro. Tixa stsomokan ja sjekabʼanumik ja bʼa wits Olivo. Ja Jesús yalunejxa yabʼ ja sjekabʼanumiki: «Ti la kanyex bʼa Jerusalén. Majlayik ja jas skʼapunej ja Tatali».

Ja sjekabʼanumiki mi yabʼye stojolil ja jas kʼan yal ja Jesús. Ti sjobʼoweyi: «¿Ojxa maʼ ochan mandaranum ja bʼa Israel?». Ja Jesús sjakʼa: «Ja Jyoba mito skʼana oj ochkon mandaranum. Pe ja weʼnlexi ojxta ajukawilex ja yip ja Dyosi bʼa oj ya awipex, sok oj kʼotanik jtaʼumantiʼex. Ja yuj kax cholowik bʼa Jerusalén, bʼa Judea, bʼa Samaria sok ja bʼa lugar mas najat ja bʼa luʼumi».

Anto ja Jesús tixa kʼe ja bʼa satkʼinal, sok musji sok jun tsome ason. Ja snebʼumaniki kan jachan ja sateʼi, pe ja yeʼn chʼayi.

Jaxa nebʼumaniki tixa elye ja bʼa wits Olivo sok kumxiye bʼa Jerusalén. Tini kʼajyel wa stsomo sbʼaje sok yajelyi orasyon bʼa jun kwarto bʼa nalan chaʼan. Wane smajlajel bʼa oj ajuk mas stojelale yuja Jesús.