Jesu i no tlhangana ni vapizani vakwe le Galileya. I no va ruma ku maha ntiro wa lisima nguvhu, aku: ‘Fambani mu maha vapizani van’wani matikweni wontlhe. Mu va gondzisa lezvi ndzi mu gondzisileko mu tlhela mu va bhabhatisa’. I no tlhela a va tsumbisa lezvi: ‘Ndzi tava na n’wina contlhe cikhati’.

Ndzeni ka 40 wa masiku andzhako ka kuvhuxiwa kakwe, Jesu i no woneka ka vapizani vo tala le Galileya ni le Jerusalema. I no va gondzisa zvilo zva lisima a tlhela a maha zvihlamaliso zvo tala. I no guma a tlhangana ni vapostoli vakwe hi khati go gumesa le Citsungeni ca maOlivha.

Jesu i wa sina a byelile vapostoli vakwe aku: ‘Mu nga suki lomu Jerusalema. Tshamani mu rindzela lezvi Papayi a tsumbisileko’. Kanilezvi, va wa nga zvi zwisisangi a ku i wa lava ku wula yini. Hikwalaho, va no mu wutisa lezvi: ‘U lava ku sangula ku fumela tiko ga Izrayeli zvezvi ke’? Jesu aku: ‘A ci se chikela cikhati leci Jehovha a lavako ku ndziva Hosi. Na ku nga hi kale, a moya wa ku basa wu ta mu nyika ntamu, zvonake mu tava vakustumunyu va mina. Fambani mu chumayela lomu Jerusalema, Judhiya, Samariya ni ka matshamu man’wani ya le kule’.

Jesu i no gumesa a sangula ku tlakuka a tlhela tilweni zvonake a vhalelwa hi refu. A vapizani vakwe va no simama ku cuwuka le hehla, kanilezvi i wa fambile.

A vapizani va no suka le Citsungeni ca maOlivha vaya Jerusalema. Va wa tlhangana hi kukhandzakanya lomu ndlwini ya le hehla va maha mikombelo, na va rindzela ku Jesu a va nyika zvileletelo zvin’wani.