Te Jesús la stsob sba sok te jnopojeletik yuʼun ta Galilea. La yakʼ jun mantalil te kʼax mukʼ skʼoplale: “Baanik sok otsesaik ta jnopojel spisil te ants winiketik ta spisil nasionetik. Akʼtiklanbeya snopik spisil te bintik la kakʼbeyex anopik sok akʼtiklanbeyaik yichʼik jaʼ”. Ta patil la yaltiklanbey ta jamal: “Julukme ta awoʼtanik te spisil-ora ya jokinexe”.

Te kʼalal chaʼkuxajemix-a te Jesuse la yakʼxan sba ta ilel 40 kʼajkʼal ta stojol bayal ta cien jnopojeletik yuʼun ta Galilea sok ta Jerusalén. Bayal bintik la yakʼtiklanbey snop sok la spastiklan milagroetik. Ta patil, la stsob sba sok te jpuk-kʼopetik yuʼun ta slajibal buelta ta wits Olivoiltik. Jich yichʼojikix albeyel yuʼun-a te Jesús: “Mame xlokʼex ta Jerusalén. Maliyaik te bin jamal yaloj te Tatil te ya yakʼbeyexe”.

Te jpuk-kʼopetike maba kʼoem ta yoʼtanik-a te bin la skʼan la yal te Jesuse, jich yuʼun la sjojkʼoybeyik: “¿Yabal x-ochatix ta ajwalil yuʼun Israel?”. Te Jesús la sut: “Te Jehová mato skʼan te ya x-ochon ta ajwalile. Pero te jaʼexe nopolme ya awichʼik te chʼul espiritu te ya yakʼbeyex awuʼelik, jichme testigo ya xkʼoex kuʼun. Jaʼ yuʼun baanik ta scholel skʼop Dios ta Jerusalén, Judea, Samaria sok kʼalal ta stiʼil te Balumilale”.

Jich mo bael te Jesús ta chʼulchan sok potsot ta tokal. Te jnopojeletik yak yilbelik te chʼulchane, pero sakchʼay bael te Jesuse.

Te jnopojeletik lokʼik ta wits Olivoiltik bajtʼik ta Jerusalén. Tey kʼayemik ta stsobilanel sbaik sok ta skʼoponel Dios ta jun kuarto te ay ta schaʼkajal na. Yakik ta smaliyel te ya yichʼikxan albeyel yuʼun Jesús te bin ya skʼan pasele.