Jesu vẹ idibo rọyen vwoma vwẹ Galili. Ọ da kẹ ayen iji ọghanghanre nana: ‘Ovwan yanran re ru idibo rẹ ihwo rẹ ẹkuotọ na eje. Yono ayen erọnvwọn rẹ mi yono ovwan, we ji bru ayen phiyame.’ O de ve kẹ ayen nẹ, ‘Karophiyọ, me vẹ ovwan herọ ọkieje.’

Uvwre rẹ ẹdẹ 40 ra vwọ rhọvwọn nushi nu, Jesu vwomaphia kẹ idibo rọyen ri te ujorin buebun vwẹ Galili kugbe Jerusalẹm. O yono ayen iyono eghanghanre, o de ji ru igbevwunu buebun. Jesu vẹ iyinkọn na da rhoma vwoma vwẹ Ugbenu rẹ Oliv, ọnana yen obọ rọ koba. Ọ da ta: ‘Ovwan vrẹn nẹ Jerusalẹmu-u. Ovwan hẹrhẹ oborẹ Ọsẹ na veri.’

Iyinkọn na vwo ẹruọ rẹ oborẹ Jesu ta na-a. Ayen da nọ: ‘Wọ cha dia Ovie rẹ Izrẹl re?’ Jesu da ta: ‘Ọke rẹ Jihova vwọ guọnọ nẹ me dia Ovie ji te-e. Ọmọke krẹn, ovwan cha mrẹ ẹgba rẹ ẹwẹn ọfuanfon na, ovwan ke cha dia iseri mẹ. Ovwan re ghwoghwo vwẹ Jerusalẹm, Judia, Sameria, kugbe asan ri me sheri vwẹ akpọ na.’

Jesu de kpo odjuvwu, irharheghe na de rhurho. Idibo na ki no, jẹ ọ yanran.

Idibo na de vrẹn nẹ Ugbenu rẹ Oliv na ayen de kpo Jerusalẹm. Kọke kọke yen ayen vwọ vwoma vwẹ uvun rẹ obenu na, ayen me nẹrhovwo. Ayen hẹrhẹ ọke rẹ Jesu cha vwọ kẹ ayen odjekẹ efa.