Yesu o ṱangana na vhafunziwa vhawe ngei Galilea. O vha ṋea mushumo wa ndeme: ‘Iyani ni ite vhathu vha tshaka dzoṱhe vhafunziwa, ni vha funze zwe nda ni funza nahone ni vha lovhedze.’ A vha fulufhedzisa uri: ‘Ni humbule uri ndi na inwi tshifhinga tshoṱhe.’

Maḓuvha a 40 musi o no vuswa, Yesu o ḓivhonadza kha vhafunziwa vhawe vhanzhi ngei Galilea na Yerusalema. O vha funza zwithu zwa ndeme na u ita vhuṱolo vhunzhi. Yesu a ṱangana na vhaapostola vhawe lwa u fhedzisela ngei Thavhani ya Miṱwari. A ri: ‘Ni songo ṱuwa Yerusalema. Ni dzule no lindela zwe Khotsi a fulufhedzisa.’

Vhaapostola vhawe a vho ngo pfesesa zwe a vha a tshi khou zwi amba. Vha mu vhudzisa uri: ‘Naa zwino ni khou ḓo vha Khosi ya Isiraele?’ Yesu a ri: ‘Tshifhinga tshe Yehova a tshi vhea uri ndi vhe Khosi a tshi athu u swika. Hu si kale ni ḓo wana maanḓa a muya mukhethwa nahone ni ḓo vha ṱhanzi dzanga. Iyani ni huwelele Yerusalema, Yudea, Samaria na zwipiḓani zwa kule vhukuma zwa ḽifhasi.’

Nga murahu, Yesu a takulelwa nṱha, a tsirwa nga gole. Vhafunziwa vhawe vha sokou sedza nṱha, fhedzi vha si tsha mu vhona.

Vhafunziwa vha ṱuwa Thavhani ya Miṱwari vha ya Yerusalema. Vho vha tshi ṱangana na u rabela tshifhinga tshoṱhe nḓuni ya nṱha. Vho vha vho lindela Yesu a tshi vha ṋea vhuṅwe vhulivhisi.