Yesu aahikumana ni awiixutti awe oGalileya. Owo aahaaruma muteko wootthuneya ohimyaka so: ‘Murowe, mwaapake awiixutti atthu a ilapo sotheene, mwawiixuttiheke sotheene soorumalyaakani ni mwaabatizeke’. Moottharelana, aahaaleiherya so: ‘Muhiliyale wira miyo kinookhala ni nyuwo mahiku othene’.

Muhina mwa mahiku 40, nuumala ohihimuwa, Yesu aahaakhumelela awiixutti awe anceene oGalileya ni oYudeya. Owo aahiwiixuttiha itthu sinceene sootthuneya ni aahipaka miiriirya sinceene. Nuumala-vo, Yesu aahithukumana ni arummwa awe mukwaha wookiserya, omwaako Olivera. Owo aahaaleela so: ‘Muhikhume oYerusalemu. Mulipeleleke etthu aTiithi aleihenrye aya’.

Arummwa awe khiyaiwexenxe yootaphulela ya masu ale. Awo yaahimukoha so: ‘Pwiya, ti yoola okathi onrowa anyu okhala Mwene a wIsarayeli?’ Yesu aahiwaakhula wira: ‘Ola khahiyo okathi Yehova okithanlenle awe wira kikhale Mwene. Moohipisa munimwaakhela ikuru sa munepa wootteela, ni munrowa okhala anamoona aka. Murowe mwalaleerye oYerusalemu, oYudeya, oSamariya, mpakha omalenle elapo’.

Ahimyakaru itthu iya, Yesu aahiwela wiirimu, aahikhuneeliwa ni neeku. Arummwa awe yaahihala nlelo ewehexexaka osulu, masi Yesu aahirowa.

Arummwa yaahivenya omwaako Olivera, anarowa oYerusalemu. Awo yaanithukumana moohihiyererya oYerusalemu esaala ya osulu ni yaanilompa. Yaahimulipelela Yesu wira aavahe malakiheryo makina.