Fanojy pianatranany ndraiky Jesosy ta Galilia. Nisy raha maventy nan̈irahany iro, ke hoizy: ‘Mandihana mampianatra olo amy firenena jiaby. Ampianara iro raha jiaby nampianariko anaro, baka io ataova batisa iro.’ Izy baka tio mbala nivolan̈a: ‘Tsarova, fa zaho han̈ampy anaro fo.’

Niboaka tamy pianatranany maro Jesosy ta Galilia ndreky ta Jerosalema, tan̈atiny 40 andra tafaranizy velon̈o. Izy nampianatra iro raha maventy sady nan̈ano fahagagan̈a maro koa. Tamy Bongo Oliva izy ndreky apostoly aby io niaraka farany. Hoizy: ‘Anaro aza miala a Jerosalema eto, firaka anaro mahazo raha nivolan̈iny Baba taminaro.’

Tsy haindro apostoly aby io raha tiany Jesosy volan̈iny, ke ho iro: ‘Efa izioty ma anao hanjary panjakany Israely?’ Ho Jesosy: ‘Mbala tsy zioty fotoan̈a han̈anovany Jehovah zaho ho Panjaka. Efa hely tavela anaro hahazo fan̈ahy masin̈y, ke hanjary vavolombelon̈onaka. Mandihana mitory a Jerosalema, a Jodia, a Samaria, ndreky firaka amy tany farany lavitry an̈y.’

Jesosy baka tio nanonga tandan̈itry. Namango nisan̈andra iro pianatra aby io fa izy tsy hitandro, fotony izy nitakofany rondro.

Pianatra aby io koa fa niala tamy Bongo Oliva, iro nandeha ta Jerosalema. Iro zatra niaraka nivory ndreky nivavaka taminy efitry araiky tan̈abo etazy. Efa niambin̈y mare iro, fotony mbala misy raha tiany Jesosy hambarany iro.