Jesuseʼ tu muchʼuba yéetel u disipuloʼob Galileaeʼ, ka tu kʼubéentajtiʼob le meyajaʼ: ‹Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob. Kaʼanseʼex tiʼob tuláakal le baʼaxoʼob tsʼoʼok in waʼalikteʼexoʼ yéetel tsʼáaʼex u yokjaʼob›. Ka tsʼoʼokeʼ tu yaʼalajtiʼob: ‹Maʼ u tuʼubulteʼexeʼ teneʼ mantatsʼ kin antal ta wéeteleʼex›.

Ka tsʼoʼok u kaʼa kuxtaleʼ, Jesuseʼ 40 kʼiinoʼob tu chíikbesuba tiʼ u cientosil u disipuloʼob yanoʼob Galilea yéetel Jerusalén. Tu kaʼansajtiʼob baʼaloʼob jach kʼaʼanaʼantak yéetel tu beetaj yaʼab milagroʼob. Tu muchʼuba xan u tsʼook juntéen yéetel u apostoloʼob tu Puʼukil le Olivoʼoboʼ. Jesuseʼ tsʼoʼok kaʼach u yaʼaliktiʼob: ‹Maʼ a lukʼleʼex Jerusalén, seguernak a páaʼtkeʼex le baʼax u yaʼalmaj le Taata u tsʼáaikoʼ›.

Le apostoloʼoboʼ maʼ tu jach naʼatoʼob le baʼax tu yaʼalaj Jesusoʼ, le oʼolal tu kʼáatoʼob tiʼ: ‹¿Yaan wa a beetik a reyil tu luʼumil Israel teʼ kʼiinoʼobaʼ?›. Jesuseʼ tu yaʼalajtiʼob: ‹Jéeobaeʼ maʼ u kʼáat ka in beet in reyil beoraaʼ. Chéen baʼaleʼ, maʼ tun xáantaleʼ yaan a kʼamkeʼex kiliʼich muukʼ. Lelaʼ yaan u tsʼáaikteʼex páajtalil utiaʼal a beetkabaʼex j-jaajkunajil tiʼ teen. Le oʼolal xeeneʼex kʼaʼaytaj tu kaajil Jerusalén, Judea, Samaria tak tu maas náachil le Luʼumaʼ›.

Jesús túuneʼ bin teʼ kaʼanoʼ ka piʼix tumen junpʼéel múuyal. U disipuloʼobeʼ táan kaʼach u paktikoʼob u bin teʼ kaʼanoʼ tak ka saʼati.

Le disipuloʼoboʼ lukʼoʼob tu Puʼukil le Olivoʼoboʼ ka binoʼob Jerusalén. Teʼeloʼ suuk u muchʼkubaʼob orar tiʼ junpʼéel cuarto yaan tu kaʼanlil junpʼéel naj. Táan kaʼach u páaʼtik u yaʼalaʼaltiʼob tumen Jesús baʼax uláakʼ unaj u beetkoʼob.