I nge nino apar ma Yecu odok cen i polo, lulub kore gunongo cwiny maleng. Man otimme i nino me Pentekote mwaka 33 K.M., dok dano ma gia ki i kabedo mapatpat onongo gubino i Jerucalem pi kwer man. Lulub kor Yecu ma welgi romo 120 onongo gugure i rum mo ma malo. Cutcut, gin mo me aura otimme. Gin mo ma nen calo leb mac opye i wi ngat acel acel i kingi ci gucako loko leb mapatpat. Woo mo matek calo yamo ma kodo mager opongo ot ducu.

Wele ma gia ki i lobe mukene ma gubino i Jerucalem guwinyo woo man ci gungweco wa i ot-ti ka neno gin ma tye ka timme. Guuro matek tutwal i kare ma guwinyo ka lupwonnye pa Yecu giloko leb magi. Guwaco ni: ‘Jo ma giloko-ni ducu gua ki i Galilaya. Twere nining ni gitye ka loko lebwa kikome?’

Ka dong Petero ki lukwena mukene gucung i nyim lwak. Petero otito bot lwak kit ma kineko kwede Yecu ki kit ma  Jehovah ocere woko ki i kin jo muto. Petero owaco ni: ‘Yecu kombeddi tye i polo i nget Lubanga yo tung acuc, dok en aye oonyo cwiny maleng kit ma yam ociko. Man aye gin mumiyo wuneno dok wuwinyo tango magi.’

Lok pa Petero ogudo cwiny dano adada mumiyo gupenye ni: ‘Ngo ma myero watim?’ En owaccigi ni: ‘Wungut i kom balwu wek kibatijawu i nying Yecu. Wun bene wubinongo mot me cwiny maleng.’ I nino meno, jo ma romo 3,000 gunongo batija. Cakke ki i kare meno, wel lulub kor Yecu obedo ka medde matek i Jerucalem. Ki kony pa cwiny maleng, lukwena gucako kacokke mapatpat wek gupwony lupwonnye manyen jami ducu ma Yecu ocikogi kwede.