Benɛ Yesu kpale kɛ ho hiɔwe ya a, ligbi nyɔngma se ɔ, mumi klɔuklɔu ba e kaseli ɔmɛ a nɔ ngɛ Pentekoste ligbi ɔ nɔ, ngɛ jeha 33 ɔ mi. Nihi je he slɔɔtoslɔɔtohi kɛ ba Yerusalɛm konɛ a ba ye Pentekoste ligbi ɔ. Yesu kaseli nɛ a yibɔ maa su 120 bua a he nya ngɛ hiɔwe tsu ko mi. Si kake too ɔ, nyakpɛ nɔ́ ko ba. Nɔ́ ko kaa la lilɛ ba ma kaseli ɔmɛ a ti nɔ fɛɛ nɔ yi mi, kɛkɛ nɛ a bɔni gbi slɔɔtoslɔɔtohi tumi. Ngmlaa ko nɛ nya wa wawɛɛ ba we ɔ mi kaa kɔɔhiɔ ngua ko nɛ ngɛ fiae.

Nihi nɛ a je ma kpahi a nɔ kɛ ba Yerusalɛm ɔ nu ngmlaa a, nɛ a ma fo kɛ ya we ɔ mi konɛ a ya hyɛ nɔ́ nɛ ba. Benɛ a na kaa kaseli ɔmɛ ngɛ gbi slɔɔtoslɔɔtohi tue ɔ, e pee mɛ nyakpɛ. A de ke: ‘Nimli nɛ ɔmɛ je Galilea. Lɛɛ kɛ pee kɛɛ nɛ a nyɛ nɛ a ngɛ wa gbi tue?’

Kɛkɛ nɛ Petro kɛ bɔfo kpa amɛ da ni ɔmɛ a hɛ mi, nɛ Petro de ni ɔmɛ bɔ nɛ a plɛ kɛ gbe Yesu ha, nɛ e tsɔɔ kaa Yehowa tle Yesu  si kɛ je gbeje. Petro de ke: ‘Amlɔ nɛ ɔ, Yesu hii si ngɛ Mawu hiɔ nɔ ngɛ hiɔwe, nɛ e plɛ mumi klɔuklɔu ɔ nɛ e wo si kaa e ma ha wɔ ɔ kɛ pue wa nɔ. Enɛ ɔ he nɛ nyɛ nu nyakpɛ ní nɛ ɔmɛ, nɛ nyɛ na kɛ nyɛ hɛ ngmɛ ɔ nɛ.’

Petro munyu ɔ wo mɛ he wami wawɛɛ nɛ a bi ke: “Mɛni e sa kaa waa pee?” E de mɛ ke: ‘Nyɛ tsake nyɛ tsui, nɛ nyɛ ti nɔ fɛɛ nɔ nɛ ha nɛ a baptisi lɛ ngɛ Yesu biɛ mi. Nyɛ ma ná nike ní nɛ ji mumi klɔuklɔu ɔ.’ Jamɛ a ligbi ɔ, a baptisi nimli maa pee 3,000. Kɛ je jamɛ a ligbi ɔ nɔ kɛ yaa a, kaseli ɔmɛ a he bɔni hiɛmi mlamlaamla ngɛ Yerusalɛm. Mumi klɔuklɔu ɔ ye bua bɔfo ɔmɛ nɛ a to asafohi fuu sisi. A pee jã konɛ a nyɛ nɛ a tsɔɔ kaseli ɔmɛ níhi tsuo nɛ Yesu fã mɛ ke a pee ɔ.