Sampulu ari dung naik Jesus tu surgo, mandapot tondi parbadia ma angka muridna. Tingki i, ari Pentakosta taon 33 M. Godang do angka jolma na ro tu Jerusalem laho mangarayahon ari Pentakosta. Adong ma 120 halak murid ni Jesus na marpungu di sada jabu. Tompu ma adong na songon dila ni api di ginjang ni ulu ni nasida. Gabe boi ma nasida mangkatai di godang bahasa. Jala tarbege ma soara ni alogo mansai gogo.

Dibege angka halak na ro tu Jerusalem i ma adong soara. Lari ma nasida tu jabu i laho mangida aha na masa. Heran ma nasida mangida angka murid i ala boi mangkatai di godang bahasa. Didok nasida ma, ‘Kan halak Galilea do halak on? Boasa diboto nasida bahasanta?’

Jongjong ma si Petrus dohot murid na asing di jolo ni angka halak na ro i. Didok si Petrus ma, ‘Nunga dihukum mate Jesus, alai mulak  mangolu do ibana dibahen Jahowa.’ Didok ma muse, ‘Saonari nunga di surgo Jesus, di sabola kanan ni Debata. Dilehon do tondi parbadia songon janjina i. I do alana adong mukjizat on.’

Las do roha ni nasida mambege hata ni si Petrus i. Gabe disungkun nasida ma, ‘Aha ma na ingkon diulahon hami?’ Didok si Petrus ma, ‘Ingkon muba do hamu jala tardidi di bagasan goar ni Jesus. Dung i pe asa dapotmuna tondi parbadia.’ Gabe adong ma 3.000 halak na tardidi sadari i. Mulai sian i, lam godang ma murid ni Jesus di Jerusalem. Ala diurupi tondi parbadia, lam godang ma huria ni halak Kristen. Gabe boi ma nasida mangajarhon angka parenta ni Jesus.