Napulo ka adlaw human mobalik si Jesus sa langit, nadawat sa iyang mga tinun-an ang balaang espiritu. Pentekostes 33 C.E. kadto, ug daghang tawo ang nangadto sa Jerusalem gikan sa lainlaing lugar aron magsaulog. Mga 120 ka tinun-an ni Jesus ang nagtigom sa usa ka lawak sa itaas. Kalit lang nga naay talagsaong nahitabo. Dunay morag kalayo nga nakita ibabaw sa ulo sa matag tinun-an, ug silang tanan nagsultig lainlaing pinulongan. Dayon naay nadunggan nga morag huros sa kusog nga hangin.

Ang mga tawo nga miadto sa Jerusalem nakadungog sa kabanha ug nanagan paingon sa balay aron mahibalo kon unsay nahitabo. Nakurat sila pagkadungog nila nga nagsultig lainlaing pinulongan ang mga tinun-an. Sila miingon: ‘Taga-Galilea ning mga tawhana. Nganong makasulti man sila sa atong pinulongan?’

Dayon si Pedro ug ang ubang apostoles mibarog atubangan sa mga tawo. Gisulti ni Pedro kon sa unsang paagi gipatay si Jesus ug kon  giunsa si Jesus pagbanhaw ni Jehova. Si Pedro miingon: ‘Si Jesus naa na karon sa langit, sa tuong kamot sa Diyos, ug iyang gibubo ang balaang espiritu nga gisaad niya. Kana ang rason kon nganong nakita ug nadungog ninyo kini nga mga milagro.’

Natandog pag-ayo ang mga tawo sa gisulti ni Pedro ug nangutana sila: “Unsay among buhaton?” Siya mitubag: ‘Paghinulsol mo ug pabawtismo sa ngalan ni Jesus. Madawat usab ninyo ang gasa nga balaang espiritu.’ Nianang adlawa, mga 3,000 ang nagpabawtismo. Sukad niadto, paspas kaayong midaghan ang mga tinun-an sa Jerusalem. Sa tabang sa balaang espiritu, ang mga apostoles nagtukod ug dugang nga mga kongregasyon aron ilang matudloan ang mga tinun-an sa tanang gisugo ni Jesus kanila.