Esi Yesu trɔ yi dziƒo le ŋkeke ewo megbe la, eƒe nusrɔ̃lawo xɔ gbɔgbɔ kɔkɔea. Ƒe 33 K.Ŋ. ƒe Pentekosteŋkekea dzi ye, eye amewo tso teƒe vovovowo va Yerusalem be yewoava ɖu azã. Yesu ƒe nusrɔ̃la siwo ade 120 ƒo ƒu ɖe dziƒoxɔ aɖe dzi le aƒe aɖe me. Enumake, nukunu aɖe dzɔ. Nane si le abe dzoƒaɖe ene la dze ɖe nusrɔ̃lawo dometɔ ɖe sia ɖe ƒe ta dzi eye wodze gbe bubuwo dodo gɔme. Gbeɖiɖi gã aɖe si le abe yaƒoƒo sesẽ aɖe ene la yɔ aƒea me.

Amedzro siwo tso anyigba ƒe teƒe bubuwo va Yerusalem la se gbeɖiɖia eye woƒu du yi aƒea me be yewoakpɔ nu si le dzɔdzɔm. Ewɔ nuku na wo esi wose nusrɔ̃lawo nɔ gbe vovovowo dom. Wogblɔ be: ‘Menye Galileatɔwoe ame siawo nye oa? Aleke wòdzɔe be wole mía degbewo dom?’

Ale Petro kple apostolo bubuawo tɔ ɖe ameawo ŋkume. Petro gblɔ ale si wowu Yesu eye Yehowa fɔe ɖe tsitre tso ame  kukuwo dome la na wo. Petro gblɔ be: ‘Fifia Yesu le Mawu ƒe ɖusime le dziƒo eye wòkɔ gbɔgbɔ kɔkɔea ɖe mía dzi abe ale si wòdo ŋugbee ene. Esia tae miekpɔ nu sia eye miese nukunu siawo ɖo.’

Petro ƒe nyawo wɔ dɔ ɖe ameawo dzi eye wobia be: “Nu kae míawɔ?” Egblɔ na wo be: ‘Mitrɔ dzi me tso miaƒe nu vɔ̃wo me eye mina woanyrɔ mi ɖe Yesu ƒe ŋkɔ me. Miaxɔ nunana si nye gbɔgbɔ kɔkɔea hã.’ Gbe ma gbe la, ame siwo ade 3,000 kloe ye wonyrɔ. Tso gbe ma gbe la, nusrɔ̃lawo yi edzi nɔ dzidzim ɖe edzi le Yerusalem kabakaba. Le gbɔgbɔ kɔkɔea ƒe kpekpeɖeŋu me la, apostoloawo ɖo hame geɖewo ale be woate ŋu afia nu siwo katã ƒe se Yesu de na wo la wo.