Usen duop ke Jesus ama akafiak ọnyọn̄ heaven, mbet esie ẹma ẹbọ edisana spirit. Ekedi ke usen Pentecost eke isua 33 C.E., mme owo ẹma ẹnyụn̄ ẹto ediwak itie ẹdi usọrọ oro ke Jerusalem. N̄kpọ nte mbet Jesus 120 ẹma ẹsop idem ke ubet enyọn̄ ke ufọkenyọn̄ kiet do. Edi etise n̄kpọ emi akpade owo idem ama etịbe. N̄kpọ emi etiede nte edemeikan̄ ama odoro kpukpru mmọ ke ibuot, mmọ ẹma ẹnyụn̄ ẹtọn̄ọ ndisem nsio nsio usem. Uyom emi etiede nte uyom ọkpọsọn̄ ofụm ama ọyọhọ ufọk oro.

Isenowo emi ẹketode nsio nsio idụt ẹdi Jerusalem ẹma ẹkop uyom oro ẹnyụn̄ ẹfehe ẹka ndise se itịbede. Idem ama akpa mmọ ndikop mbet Jesus ẹsemde usem mmọ. Mmọ ẹma ẹdọhọ ẹte: ‘N̄kọ mbon Galilee ẹdi emi? Mmọ ẹnam didie ẹdiọn̄ọ usem nnyịn?’

Peter ye mme apostle eken ẹma ẹdida ke iso otuowo oro. Peter ama etịn̄ nte ẹkewotde Jesus, etịn̄ ke Jehovah ama anam  enye eset, onyụn̄ ọdọhọ ete: ‘Jesus etie ke ubọk nnasia Abasi idahaemi ke heaven; enye ọnọ edisana spirit emi Abasi ọkọn̄wọn̄ọde. Enye esịn mbufo ẹkop ẹnyụn̄ ẹkụt kpukpru utịben̄kpọ emi.’

Ikọ Peter ama odụk mmọ esịt tutu mmọ ẹdọhọ ẹte: ‘Inam didie?’ Enye ama ọdọhọ mmọ ẹte: ‘Ẹkabade esịt ẹnyụn̄ ẹna baptism ke enyịn̄ Jesus. Mbufo n̄ko ẹyebọ edisana spirit.’ N̄kpọ nte owo 3,000 ẹkena baptism usen oro. Tọn̄ọ usen oro, mbet Jesus ẹma ẹtọn̄ọ ndinen̄ede n̄wak ke Jerusalem. Edisana spirit ama an̄wam mme apostle ẹsiak ediwak esop man mmọ ẹkeme ndikpep mbet Jesus kpukpru se Jesus ọkọdọhọde mmọ ẹkpep.