10 Täg nachdem Jesus wider i Himmel zrugg isch, chömmed d Jünger de heilig Geischt über. Es isch jetzt Pfingschte im Jahr 33, und ganz vil Lüt vo überall her sind uf Jerusalem cho und fiired zäme s Pfingschtfescht. Imene Huus im oberschte Stock sind öppe 120 Jünger zäme versammlet. Plötzlich passiert öppis Ussergwöhnlichs: Überem Chopf vo jedem Jünger taucht so öppis wie es Flämmli uf, und si chönnd uf einisch i verschidene Sprache rede. Im ganze Huus ghört mer es Ruusche, wie wenns würd stürme.

Vil vo dene Bsuecher us de andere Länder ghöred das Ruusche au, und si göhnd grad go luege, was los isch. Wo si ghöred, dass d Jünger i verschidene Sprache reded, sind si ganz baff, und völlig us em Hüüsli säged si denn: «Die Lüt sind doch us Galiläa. Wiso chönnd si üsi Sprache?»

De Petrus und di andere Aposchtel stöhnd denn vor d Lüt here. De Petrus verzellt ihne vo Jesus, wie er tötet und vo Jehova wider uferweckt worde isch. Er seit denn: «Jesus isch jetzt im Himmel und sitzt uf de rechte Siite vo Gott. Und so wie ers versproche het, het er üs de heilig Geischt gee. Drum gsehnd und ghöred ihr die Wunder.»

Was de Petrus seit, berüehrt d Mensche tüüf i ihrem Herz. Si fraged ihn: «Was sölled mir jetzt mache?» Er git zur Antwort: «Tüend eui Sünde bereue und lönd euch im Name vo Jesus taufe. Denn werded ihr au de heilig Geischt als Gschenk übercho.» A dem Tag lönd sich öppe 3000 Mensche la taufe. Vo jetzt a gits z Jerusalem immer meh Jünger – und das in chürzischter Ziit. De heilig Geischt hilft de Aposchtel, neui Versammlige z gründe. So chönnd si d Jünger alles lehre, was Jesus ihne gseit het.