Pagligad sang napulo ka adlaw sa tapos magbalik si Jesus sa langit, nabaton sang iya mga disipulo ang balaan nga espiritu. Pentecostes 33 C.E. sadto, kag ang mga tawo halin sa madamo nga lugar nagkadto sa Jerusalem para sa selebrasyon. Mga 120 ka disipulo ni Jesus ang nagtipon sa ibabaw nga kuarto sang balay. Dayon gulpi lang nga may makatilingala nga natabo. Daw may mga kalayo nga nagtungtong sa ulo sang kada disipulo, kag naghambal sila sing lainlain nga lenguahe. Napuno ang balay sang gahod sang daw nagahagunos nga huyop sang hangin.

Nabatian sang mga bisita nga halin sa iban nga pungsod ang gahod gani nagdalagan sila pakadto sa balay para mahibaluan kon ano ang natabo. Natingala gid sila sang nabatian nila ang mga disipulo nga nagahambal sini nga mga lenguahe. Nagsiling sila: ‘Pero mga taga-Galilea ini nga mga tawo. Ngaa makahambal sila sang aton lenguahe?’

 Dayon nagtindog si Pedro kag ang iban nga apostoles sa atubangan sang mga tawo. Ginsugid sa ila ni Pedro kon paano ginpatay si Jesus kag nga ginbanhaw sia ni Jehova. Si Pedro nagsiling: ‘Ara na subong si Jesus sa langit sa tuo nga kamot sang Dios, kag ginbubo niya sa amon ang ginpromisa nga balaan nga espiritu. Amo kon ngaa nakita ninyo kag nabatian ini nga mga milagro.’

Nagpati ang mga tawo sa ginsiling ni Pedro, gani namangkot sila: “Ano ang amon himuon?” Nagsiling sia sa ila: ‘Maghinulsol kamo kag magpabawtismo sa ngalan ni Jesus. Mabaton man ninyo ang regalo nga balaan nga espiritu.’ Sa sina nga adlaw, mga 3,000 ka tawo ang nagpabawtismo. Sugod sadto, madasig nga nagdamo ang mga disipulo sa Jerusalem. Sa bulig sang balaan nga espiritu, nagtukod ang mga apostoles sang dugang nga kongregasyon para matudlo nila sa mga disipulo ang tanan nga ginsugo ni Jesus sa ila.