Kombunda yomayuva 10 Jesus tja za nokuyaruka keyuru, ovahongewa ve va pewa ombepo ondjapuke. Rari eyuva raPentekoste mombura ndji 33 O.Z., nu ovandu ve ere koJerusalem okuza kotuveze otuingi pekepeke okuyekunyanda omukandi mbwi. Pari ovaapostele vaJesus ape 120 mba woronganene mondjuwo metuwo rokombanda. Mokamanga, pa tjitwa otjiṋa otjihimise. Otjiṋa tjaatji munika tjimuna omuriro tjeya kombanda yotjiuru tjomuhongewa auhe, nu avehe va uta okuhungira momaraka pekepeke. Mondjuwo aihe mwe urire ombosiro onamasa tjimuna yotjivepo.

Ovaryange mbe ere okuza kwarwe va zuvire ombosiro ndji nave tupuka kondjuwo okukatara kutja mamu kayenda tjike. Owo va temenwe tjinene tji va muna kutja ovahongewa mave hungire omaraka nga. Owo va tja: ‘Ovandu mba va za koGalilea. Mape ya vi ve hungire omaraka wetu?’

Okuzambo Petrus novaapostele varwe va kurama komurungu wotjimbumba. Petrus wa raera ovandu kutja Jesus wa zepewa vi  nokutja Jehova we mu pendura movakoke. Petrus wa tja: ‘Nai Jesus uri meyuru kokunene kwaMukuru, nu wa tirire ombepo ondjapuke ndja kwizikwa. Eṋe opu mamu zu okumuna nokuzuva ovihimise mbi.’

Omambo waPetrus nga ya ṱuna komitima vyovandu mba nga tji va pura nave tja: “Ngatu tjite vi?” Eye we ve raera kutja, ‘Ritanaureye komauvi weṋu nu mu papitisiwe mena raJesus. Eṋe wina mamu munu otjiyandjewa tjombepo ondjapuke.’ Meyuva otjingero ndo ovandu mangara 3 000 va papitisiwa. Okuza koruveze ndo otjivaro tjovahongewa moJerusalem tja uta okuyeruruka tjinene. Nombatero yombepo ondjapuke, ovaapostele va uta ozombongo zarwe kokutja ve honge ovahongewa oviṋa avihe Jesus mbye ve rakiza.