Yesu sumsing lamu de lung mat nna 10 ya na ai hpang, chyoi pra ai wenyi hpe sape ni lu la ma ai. Dai shani gaw A.D. 33 Pentikoti shani re. Shara law law kaw na masha ni gaw dai poi lung na matu, Yerusalem de du nga ma ai. Yesu a sape 120 daram gaw, nta langai a ntsa htap kaw arau zup hpawng nga ma ai. Akajawng sha, mauhpa lam langai byin wa ai. Sape langai hpra a baw ntsa kaw wan shinglet zawn dan pru wa nna, shanhte yawng gaw ga amyu myu chye shaga wa ai. Nbung laru kaba wa ai zawn re ai nsen gaw, nta ting hpring chyat mat ai.

Yerusalem kaw du nga ai kaga mung na manam ni gaw, dai nsen hpe na yang, hpa byin nga ai hpe chye mayu ai majaw, dai nta de kagat nna sa yu ma ai. Sape ni gaw amyu ga amyu myu chye shaga nga ai hpe mu yang, shanhte grai mau mat ma ai. Shanhte ndai hku tsun ai: ‘Ndai ni gaw Galile mung na masha ni she re ai wa. Gara hku nna anhte a ga chye shaga ai kun?’

Petru hte kaga kasa ni gaw, masha hpawng a man hta tsap dat ai. Dai hpang, Petru gaw Yesu gara hku sat hkrum ai lam, Yehowa gaw shi hpe si ai kaw nna hkrung rawt ya ai lam, masha ni hpe tsun dan ai. Petru ndai hku tsun ai: ‘Ya, Yesu gaw sumsing lamu kaw, Karai Kasang a hkra maga de dung taw  nga nna, ga sadi jaw da ai chyoi pra ai wenyi ru jaw ya sai. Dai majaw, dai mauhpa lam ni hpe nanhte mu lu, na lu ai re.’

Petru tsun ai ga a majaw, masha ni gaw grai n-gun lu wa nna ndai hku san ai: ‘Anhte hpa galaw ra na kun?’ Shi ndai hku bai tsun ai: ‘Nanhte a mara hpe myit malai lu nna, Yesu a mying ningsang hta hkalup hkam la mu. Rai yang, nanhte mung chyoi pra ai wenyi lu la na re.’ Dai shani jang, masha 3,000 daram hkalup hkam la ma ai. Dai shani kaw nna, Yerusalem hta sape ni alawan grai law htam wa ai. Chyoi pra ai wenyi a karum shingtau lam hte kasa ni gaw, nawku hpung law law hpe gawde lu wa ai. Dai nawku hpung ni hta, shanhte gaw sape nnan ni hpe Yesu matsun da ai ga yawng hpe sharin ya wa ai.